Miguel Fernández comprométese a apoiar as reivindicacións da Enfermaría e mellorar a atención sanitaria e social en Lugo
O alcaldable socialista á Alcaldía de Lugo, Miguel Fernández, mantivo unha reunión de traballo coa directiva do Colexio Oficial de Enfermaría da provincia para coñecer as principais demandas do colectivo e analizar posibles vías de colaboración institucional. Fernández comprometeuse a apoiar desde o Concello, a partir de maio de 2027, as iniciativas dos profesionais para mellorar a atención á cidadanía e recoñecer o papel das preto de 2.400 enfermeiras e enfermeiros que traballan na provincia, cunha importante presenza no municipio.
Un dos asuntos centrais foi a atención ás emerxencias sociais relacionadas coa saúde mental. A directiva trasladou a súa preocupación polas dificultades para ofrecer unha resposta adecuada a determinadas situacións de vulnerabilidade e advertiu de que algunhas persoas con problemas de saúde mental están a acabar en residencias destinadas a maiores, recursos que non sempre se axustan ás súas necesidades. Fernández considerou necesario buscar unha solución coordinada entre administracións e servizos implicados.
A falta de cobertura das baixas de persoal foi outra das cuestións abordadas. As representantes do Colexio advertiron de que estas ausencias non se están substituíndo coa suficiente regularidade, o que repercute nas condicións de traballo dos equipos e na calidade asistencial. Fernández comprometeuse a trasladar esta reivindicación e defender unha dotación de persoal que garanta a continuidade dos servizos.
A reunión tamén puxo o foco na situación das enfermeiras especialistas en Xeriatría. O colectivo denuncia que, malia a creación desta categoría profesional en Galicia, non existen listas de contratación nin postos específicos no sistema sanitario público para desenvolver esta especialidade. Unha situación que consideran especialmente preocupante nunha provincia envellecida e que forma durante dous anos profesionais nesta área. «Non ten sentido investir na formación de enfermeiras especialistas en Xeriatría e despois non ofrecerlles oportunidades para traballar aquí, obrigándoas a marchar a outros territorios», sinalou Fernández.
As agresións ao persoal sanitario tamén estiveron presentes no encontro. A directiva considera que a normativa actual debe mellorarse, tanto pola contía das sancións como pola duración dalgunhas medidas, como os cambios de cupo limitados a cinco anos. Fernández mostrouse partidario de revisar estes mecanismos e ofrecer respostas máis contundentes ante os casos de agresores reincidentes. «Quen coida da nosa saúde debe poder desenvolver o seu traballo con seguridade e respecto», afirmou.
No ámbito educativo, o Colexio defendeu a incorporación de profesionais da Enfermaría aos centros escolares para reforzar a prevención, a educación para a saúde e a atención ás necesidades do alumnado. Aínda que esta competencia corresponde á Xunta, Fernández apuntou que o Concello tamén pode contribuír desde o ámbito municipal e recuperou a proposta de estender os programas de almorzos saudables a todos os colexios de Lugo, unha iniciativa que, segundo lembrou, tivo boa acollida nunha etapa anterior coa colaboración de Luisa Zarzuela.
O FUTURO DA ESCOLA DE ENFERMERÍA DE LUGO
Outro dos principais asuntos foi o futuro da Escola de Enfermaría de Lugo. O colectivo reclama un compromiso formal que garanta a continuidade do centro e evite que a súa actividade e capacidade formativa queden diluídas ou centralizadas en Santiago. Fernández apoiou esta demanda e defendeu a necesidade de preservar e fortalecer a estrutura académica na cidade. «Lugo non pode resignarse a perder capacidades nin a deixar que Santiago fagocite recursos e proxectos que deben ter continuidade na nosa cidade. Necesitamos compromisos claros e por escrito», manifestou.
Durante a reunión tamén se lembrou a etapa de Fernández á fronte da presidencia do Colexio, na que se impulsaron medidas de modernización e democratización da entidade e se traballou para reforzar a presenza social da profesión. Por último, abordouse a celebración en 2029 do centenario do Colexio Oficial de Enfermaría, unha efeméride na que o candidato se comprometeu a colaborar desde a Alcaldía. Fernández destacou o labor formativo e de acompañamento aos profesionais que desenvolve a institución e reiterou que a Enfermaría é esencial para o funcionamento do sistema sanitario e o benestar da sociedade.