Monterroso mellora o camiño entre Viloide e a estrada de Güimil a Sindín
O Concello de Monterroso iniciou as obras de acondicionamento e mellora do camiño municipal que comunica Viloide coa estrada que une Güimil e Sindín, ao seu paso por Traslama.
Os traballos permitirán renovar o firme do vial mediante a colocación de aglomerado en quente, ademais de actuar sobre os baches existentes e incorporar nova sinalización para mellorar as condicións de circulación.
A actuación conta cunha achega de 61.562 euros por parte da Consellería do Medio Rural, concedida ao abeiro do Plan de Mellora de Camiños Rurais 2026-2027.
O alcalde de Monterroso, Eloy Pérez, explicou que a intervención permitirá mellorar a accesibilidade e facilitar a circulación por este tramo. "Garantir a accesibilidade ás explotacións agropecuarias e parcelas agrícolas existentes, así como o paso de calquera tipo de vehículo", sinalou o rexedor.
Con esta actuación, o Concello busca mellorar o estado dun dos viais de titularidade municipal e facilitar os desprazamentos tanto dos veciños como dos vehículos que empregan esta vía.
A intervención está financiada a través do Plan de Mellora de Camiños Rurais 2026-2027 da Consellería do Medio Rural, dentro das actuacións destinadas á mellora das comunicacións e dos accesos no ámbito municipal.