Navia de Suarna contratará por case 80.000 euros o proxecto para reconstruír a ponte sobre o río Navia
A reconstrución da ponte sobre o río Navia, na estrada LU-P-3501 ao seu paso por Navia de Suarna, dá un novo paso coa adxudicación da redacción do proxecto técnico, que permitirá definir as actuacións necesarias para recuperar esta conexión, interrompida desde o pasado mes de xaneiro.
O contrato foi adxudicado á empresa Noega Ingenieros SL por un importe próximo aos 80.000 euros. O documento deberá concretar as características da nova infraestrutura e as solucións técnicas necesarias para a súa construción.
A ponte derrubouse tras as fortes precipitacións rexistradas en xaneiro, un incidente que obrigou a cortar o tráfico neste acceso. Aínda que a vía continúa pechada, a comunicación na zona está garantida mediante outro itinerario alternativo.
A elaboración do proxecto terá un prazo de oito meses, durante os que será necesario realizar estudos estruturais, hidráulicos, xeotécnicos e ambientais para determinar as condicións da actuación e definir a futura ponte.