O Amatis Trio de Salzburgo actúa este xoves na 53 Semana de Música do Corpus de Lugo
O Amatis Trio actuará este xoves 21 de maio ás 20:30 horas dentro do Festival de Música Cidade de Lugo – 53 Semana de Música do Corpus, unha das citas culturais máis consolidadas da cidade de Lugo.
O trío está formado pola violinista alemá Lea Clara Hausmann, o violonchelista británico Samuel Shepherd e o pianista neerlandés Mengjie Han. Trátase do único trío con piano de Europa dedicado exclusivamente a este formato, unha especialización que lle permitiu consolidar unha recoñecida traxectoria internacional.
Fundado en Ámsterdam no ano 2014 e actualmente con sede en Salzburgo, o conxunto destaca polas súas interpretacións enérxicas, pola liberdade artística e por unha programación innovadora. O grupo iniciou a súa proxección internacional tras ser distinguido como Artista de Nova Xeración da BBC Radio 3 en 2016 e como ECHO Rising Stars en 2018.
Desde entón, o Amatis Trio actuou en 46 países e obtivo importantes recoñecementos, entre eles o premio neerlandés Kersjesprijs e o galardón Borletti-Buitoni Trust. Ademais, participou en festivais de prestixio internacional como os BBC Proms, o Festival de Verbier, a Mozartwoche de Salzburgo ou o Festival de Edimburgo, ademais de ofrecer concertos en espazos emblemáticos como o Wigmore Hall de Londres, o Concertgebouw de Ámsterdam ou a Elbphilharmonie de Hamburgo.
A programación da Semana de Música do Corpus continuará o 22 de maio no Auditorio Fuxan os Ventos coa actuación da Orquestra Sinfónica Cristóbal Halffter, dirixida por Javier Fajardo, xunto á guitarrista Sara Guerrero e á cantaora Cristina Lázaro, cun programa dedicado a obras de Rodrigo e Falla baixo o título “De Aranjuez a Granada”.
O 23 de maio, o Ensemble Danguy actuará no Círculo das Artes baixo a dirección de Tobie Miller co espectáculo “La Belle Vielleuse”, centrado nos repertorios virtuosos da zanfona no século XVIII.
A programación continuará o 27 de maio no Círculo das Artes con Música Boscareccia e a soprano Alicia Amo, que interpretarán “Arianna a Naxos”, cun repertorio baseado en obras de Haydn, Schubert e Schumann.
O peche desta programación terá lugar o 30 de maio no Auditorio Fuxan os Ventos coa actuación da Orquestra Barroca Vigo 430, dirixida pola violinista Rachell Ellen Wong e coa participación da violonchelista Amarilis Dueñas, nun concerto titulado “Metamorfosis Barrocas”, dedicado a obras de Locke, Purcell, Vivaldi e C.Ph.E. Bach.