O Arde Lucus Argenteus reforza a súa programación con novos concertos e unha terceira sesión do Circo Romano
A cidade de Lugo continúa a preparar a celebración do Arde Lucus Argenteus, a edición número 25 da súa coñecida festa de recreación histórica, que este ano chegará con importantes novidades tanto no apartado musical como na programación de espectáculos. Concello e asociacións de recreación histórica presentaron os principais avances dunha edición especial que nace do diálogo e da cooperación entre as entidades implicadas na organización.
Un dos aspectos máis destacados será o reforzo da oferta musical. Ao concerto xa anunciado de Abraham Cupeiro sumarase a actuación de Celtica Pipes Rock!, unha formación europea coñecida pola combinación de música celta, rock e metal sinfónico. O grupo levará a Lugo un espectáculo no que as gaitas, os efectos visuais e a pirotecnia terán un papel protagonista.
A programación completarase coa presenza de Grimorium, unha compañía especializada en música de inspiración medieval e fantástica que ofrecerá un espectáculo no que se mesturarán interpretacións en directo, recreación histórica e animación escénica.
Outra das novidades será a ampliación do Circo Romano, unha das actividades con maior seguimento dentro da festa. Nesta ocasión contará con tres funcións diferenciadas: unha sesión de tarde, outra destinada ao público infantil e unha terceira representación nocturna, unha proposta que responde á demanda trasladada nos últimos anos por asistentes e colectivos participantes.
Durante a presentación, a alcaldesa, Elena Candia, destacou o papel fundamental das asociacións no crecemento e consolidación do Arde Lucus ao longo destes vinte e cinco anos. Pola súa banda, o concelleiro de Deportes, Infancia e Xuventude, Damián Carballo, puxo en valor o traballo realizado conxuntamente para incorporar melloras e novas iniciativas á programación.