O Arde Lucus recibe o seu recoñecemento como Festa de Interese Turístico Internacional
O concelleiro de Deportes e Xuventude de Lugo, Jorge Bustos, participou no Teatro Real de Madrid no acto de entrega de diplomas ás festas de interese turístico nacional e internacional, organizado polo Ministerio de Industria e Turismo. Durante o evento, Bustos recolleu o diploma que acredita ao Arde Lucus como Festa de Interese Turístico Internacional, un recoñecemento obtido en marzo de 2023.
O edil destacou a importancia deste galardón, compartíndoo “con todos os lucenses que traballan cada ano para recrear as nosas orixes romanas”, especialmente coas 19 asociacións de recreación histórica que forman parte da organización e cos case mil socios que participan activamente nos festexos. Ademais, agradeceu a colaboración dos diferentes sectores da cidade, os patrocinadores, centros educativos e o equipo técnico municipal que fai posible este evento. Bustos subliñou que o éxito do Arde Lucus reside na implicación da cidadanía e na aposta do Concello por recuperar o pasado romano de Lugo, mantendo vivo este legado a través dunha recreación fidedigna, participativa e lúdica.
“Exportamos a imaxe máis positiva e cordial do noso municipio e dos seus habitantes”, afirmou o concelleiro. O Arde Lucus, que comezou no 2002 como unha pequena festa para dinamizar o sector hostaleiro do centro histórico, foi evolucionando ata converterse nun evento histórico, cultural e económico de gran importancia. No 2011, foi recoñecida como Festa de Interese Turístico de Galicia, e en 2017 obtivo o distintivo de Festa de Interese Turístico Nacional. Tras cumprir o prazo mínimo de cinco anos con esta última distinción, o Concello iniciou os trámites para conseguir o recoñecemento internacional, que agora foi concedido.
O Arde Lucus amplíase hoxe en día a catro días de celebración, comezando o xoves e prolongándose ata o domingo, atraendo cada ano milleiros de visitantes que se suman á recreación do pasado romano da cidade. As 19 asociacións que forman parte da súa organización son fundamentais para o éxito deste evento, que combina identidade, patrimonio, cultura e dinamización económica, facendo do Arde Lucus unha festa única.
