Infraestructuras

Rubén Arroxo critica que o proxecto municipal reduce a capacidade de estacionamento e reclama á Xunta que impulse unha infraestrutura de maior dimensión

O portavoz do BNG no Concello de Lugo, Rubén Arroxo, asegurou que o Partido Popular continúa demostrando, ao seu xuízo, "falta de proxecto para a cidade" ao non impulsar a construción dun novo aparcadoiro público en Fontiñas coa colaboración da Xunta de Galicia. Arroxo lembrou que o Goberno autonómico anunciara no seu día a creación desta infraestrutura, mentres que o Concello presentou recentemente un proxecto para habilitar arredor de 30 prazas nunha parcela situada na rúa Primavera.

Segundo o portavoz nacionalista, esta actuación non resolve as necesidades da zona, xa que a parcela onde se pretende intervir xa se utiliza como estacionamento informal e ten capacidade para aproximadamente 50 vehículos. Por este motivo, considera que a proposta municipal suporía incluso unha perda de prazas respecto da situación actual.

Como alternativa, o BNG defende a iniciativa presentada en forma de emenda aos orzamentos da Xunta, que aposta pola creación de máis de 100 novas prazas de estacionamento na contorna da rúa Primavera, o Carril das Hortas e o Carril das Flores. Arroxo sostivo que esta solución permitiría responder á demanda existente, optimizando os recursos públicos e mellorando o servizo para a veciñanza.

A formación nacionalista propón aproveitar un espazo que actualmente se emprega de maneira desordenada como aparcadoiro para convertelo nunha infraestrutura organizada, ao tempo que daría continuidade á remodelación do Carril das Flores que está actualmente en execución.

O proxecto contempla a construción dun estacionamento de dúas alturas, aproveitando o desnivel existente entre a rúa Primavera e o Carril das Hortas. Segundo explicou Arroxo, esta configuración permitiría optimizar o espazo dispoñible e habilitar preto dun cento de prazas para vehículos.

Ademais, a proposta inclúe a integración paisaxística da infraestrutura mediante un deseño adaptado á contorna e a creación de zonas verdes, mellorando a imaxe urbana dun ámbito situado nas proximidades do Camiño de Santiago. O estacionamento ocuparía unha superficie aproximada de 3.000 metros cadrados distribuídos en dúas plantas.

Rubén Arroxo afirmou que esta actuación podería executarse utilizando os mesmos mecanismos administrativos empregados pola Xunta para construír o aparcadoiro da avenida Breogán, mediante a declaración do proxecto como de interese autonómico. Ao seu xuízo, a Administración autonómica dispón das ferramentas legais necesarias para desenvolver esta actuación.

O portavoz do BNG tamén criticou a planificación do Partido Popular, ao considerar que a Xunta destinou arredor dun millón de euros á construción dun aparcadoiro nunha zona onde xa existía unha ampla oferta de prazas, mentres, segundo indicou, o barrio de Fontiñas continúa sen unha solución adecuada ás súas necesidades de estacionamento.