O BNG alerta de que o San Froilán segue sen pregoeiro nin responsable da ofrenda a Rosalía a menos dun mes das festas
O BNG reclamou a convocatoria inmediata dunha nova reunión da Comisión de Festas para avanzar nos preparativos do San Froilán 2026 e resolver os aspectos do programa que continúan pendentes cando falta menos dun mes para o inicio das celebracións.
A concelleira nacionalista Maite Ferreiro puxo o foco especialmente en dúas das principais incógnitas da programación: quen pronunciará o pregón e quen se encargará da tradicional ofrenda a Rosalía de Castro. "A menos dun mes das festas aínda non sabemos quen vai dar o pregón nin quen realizará a ofrenda a Rosalía", advertiu.
Ferreiro cualificou de "inaceptable" que cuestións que considera centrais na programación permanezan sen concretar a estas alturas. A edil lembrou que tanto o pregón como a ofrenda floral forman parte dos actos máis representativos do San Froilán e defendeu que precisan dunha planificación suficiente, ademais de comunicar con antelación as persoas ou entidades elixidas para protagonizalos.
Desde o BNG atribúen esta situación á maneira na que se está desenvolvendo a organización das festas e critican tamén a actitude do PP dentro da Comisión de Festas. Ferreiro considera que a falta de información evidencia "a falta de experiencia do PP, que leva anos abandonando a Comisión de Festas só por seguir crispando".
A formación nacionalista reivindica este órgano como un espazo necesario para a coordinación, a participación dos grupos e o seguimento dos preparativos. Por este motivo, reclama que volva reunirse canto antes para aclarar as cuestións que permanecen abertas.
"Cómpre convocar de inmediato unha nova xuntanza para deixar pechados todos os aspectos do San Froilán 2026 e garantir que a organización se desenvolva con tempo, transparencia e rigor", afirmou Ferreiro.
A concelleira insistiu na necesidade de evitar que as decisións sobre algúns dos actos máis destacados se adopten ás portas das celebracións. "O San Froilán é a gran festa do outono galego e merece unha organización á altura da súa importancia", sinalou.
Ferreiro pediu finalmente ao goberno local maior previsión e información pública sobre o programa. "A veciñanza de Lugo ten dereito a coñecer con antelación os contidos fundamentais das súas festas e a saber que criterios se están a seguir para configurar o programa", concluíu.