O BNG cuestiona que a actuación inaugural do San Froilán non sexa dunha agrupación lucense
A concelleira do BNG Maite Ferreiro valorou positivamente que o programa do San Froilán 2026 manteña a presenza das agrupacións de música tradicional de Lugo, aínda que cuestionou a elección da formación encargada de abrir oficialmente as festas. A edil considera que ese primeiro acto debería estar protagonizado por unha agrupación da cidade.
Segundo o programa, a apertura incluirá un pasarrúas previo ao pregón, cun remate previsto na praza Maior, que correrá a cargo da Real Banda de Gaitas da Deputación de Ourense. Ferreiro lamentou que nesta ocasión non se optase por unha formación lucense para asumir ese papel. O programa das festas contempla, ademais, unha presenza específica da música tradicional, a cultura galega e as agrupacións locais na praza de Santa María, así como máis de 40 pasarrúas ao longo da celebración.
A concelleira do BNG cuestionou tamén a elección da Real Banda de Gaitas de Ourense ao considerar que "non xera un amplo consenso" no ámbito da música tradicional polo tipo de instrumentos que emprega, que, segundo sinalou, presentan características morfolóxicas diferentes respecto da gaita galega.
Ferreiro considerou que manter as agrupacións de música tradicional de Lugo no programa é "unha boa noticia", pero afirmou que a elección da actuación inaugural responde, ao seu xuízo, "a unha imposición do PP máis que a unha aposta pola cultura tradicional".
A edil defendeu que as festas deben servir tamén para dar visibilidade ao tecido cultural local e recoñecer o traballo que asociacións, escolas e agrupacións desenvolven durante todo o ano. Neste sentido, sinalou que situar unha formación lucense na primeira actuación permitiría mostrar ante a veciñanza e as persoas visitantes o traballo realizado no ámbito da música tradicional.
Ferreiro destacou especialmente o labor de formación e divulgación desenvolvido polas entidades culturais da cidade e considerou que o San Froilán constitúe unha oportunidade para reforzar o seu papel dentro da programación festiva.
PROGRAMACIÓN COMPLETA SAN FROILÁN