O BNG denuncia a ausencia dun proxecto definido para o futuro da estación de autobuses de Lugo
O portavoz do BNG de Lugo, Rubén Arroxo, cuestionou a resposta remitida pola Xunta de Galicia á iniciativa presentada pola formación nacionalista no Parlamento galego para promover a creación dun Gran Parque Central nos terreos que actualmente ocupa a estación de autobuses da cidade.
Segundo explicou Arroxo, a contestación do Executivo autonómico non aclara se apoia ou non esta proposta e limítase a facer referencia a un protocolo e a posibles estudos sobre os futuros usos da infraestrutura unha vez entre en funcionamento a nova estación intermodal. Para o representante nacionalista, esta resposta evidencia a falta dunha estratexia clara do Partido Popular para Lugo.
O portavoz do BNG sinalou que a Xunta evita pronunciarse sobre unha iniciativa que, ao seu xuízo, conta cun importante respaldo tanto social como institucional. “Preguntámoslle directamente se apoia a creación dun Gran Parque Central e responde falando de procedementos e análises futuras, sen aclarar a súa posición”, indicou.
Arroxo considera que esta forma de actuar responde a unha dinámica xa coñecida na cidade, baseada en prolongar os prazos e evitar compromisos concretos. Neste sentido, lembrou outros proxectos que, segundo afirmou, permaneceron durante anos sen avances significativos, como a Vella Residencia, a Tinería, o Cuartel de San Fernando ou o edificio de ASPNAIS.
O portavoz nacionalista tamén destacou que o Partido Popular modificou en varias ocasións a súa postura respecto ao futuro da estación de autobuses. Segundo apuntou, ao longo dos últimos anos foron presentadas distintas alternativas para este espazo, mentres que agora a formación popular opta por non concretar unha proposta definitiva.
Para o BNG, a creación dun Gran Parque Central representaría unha oportunidade para transformar unha das áreas urbanas máis relevantes da cidade, incrementando os espazos verdes dispoñibles, mellorando a calidade de vida da cidadanía e impulsando un modelo urbano máis orientado ás necesidades das persoas.
A formación nacionalista avanzou que continuará defendendo esta iniciativa tanto no Parlamento galego como no Concello de Lugo e reclamou que sexa a propia veciñanza quen participe activamente na decisión sobre o futuro dun espazo considerado estratéxico para o desenvolvemento da cidade.