O BNG pide acelerar a reparación das fochancas que seguen sen arranxar en varias rúas de Lugo
Varios socavóns e fochancas que apareceron nos últimos meses en diferentes vías urbanas de Lugo continúan sen ser reparados, unha situación que o BNG considera necesario resolver con maior rapidez para evitar riscos e molestias á veciñanza.
O grupo municipal nacionalista presentou un rogo no Concello para reclamar ao Goberno local que axilice as actuacións de mantemento da rede viaria e dea resposta ás avarías que permanecen pendentes. Segundo sinala a formación, nalgúns puntos mantense desde hai semanas unha sinalización provisional para advertir do perigo.
Entre os casos sinalados polo BNG atópanse un socavón situado na Avenida da Coruña, á altura do número 224, e outro na rúa San Roque, na zona de confluencia coa Ronda da Muralla. "Dous espazos que levan semanas cunha sinalización e tapados con planchas, o que supón un problema para a veciñanza", explicou a edil Maite Ferreiro.
A formación considera que o mantemento das vías debe permitir actuar con maior axilidade cando aparecen danos no firme, tanto para garantir a seguridade das persoas usuarias como para evitar que as deficiencias se prolonguen no tempo.
Ferreiro defendeu ademais o traballo desenvolvido polo BNG durante os últimos anos para reforzar o servizo público encargado do mantemento urbano. Nese sentido, asegurou que o obxectivo foi "axilizar o máximo posible todas as reparacións urbanas" e reclamou que esta capacidade de resposta se manteña tamén ante as incidencias que se producen actualmente.