O BNG pide explicacións sobre a planificación municipal na prevención de incendios forestais
O concelleiro do BNG no Concello de Lugo, Alexandre Penas, preguntará ao goberno municipal sobre a planificación prevista para a loita contra os incendios forestais, unha cuestión que, segundo indicou, está a xerar inquietude entre a veciñanza ante a chegada dos meses con maior risco.
Penas sinalou que Lugo xa se atopa no mes de xullo e vén de atravesar un dos primeiros períodos de altas temperaturas do verán, unha situación que incrementa a preocupación arredor das medidas preventivas fronte aos incendios. Segundo explicou, a cidadanía trasladou dúbidas sobre a organización e os traballos previstos pola brigada municipal encargada da defensa contra os lumes forestais.
O Concello de Lugo recibe durante este ano 2026 unha achega da Xunta de Galiza por importe de 101.250 euros destinada á contratación do persoal dunha brigada de prevención e defensa contra incendios forestais. Este equipo desenvolve cada verán actuacións de acondicionamento e limpeza en distintos espazos distribuídos entre as 54 parroquias do municipio.
Segundo expuxo o representante nacionalista, de cara ao presente exercicio o goberno local do PP, apoiado pola concelleira tránsfuga, non deu a coñecer nin o plan de actuacións nin as datas nas que a brigada realizará os seus traballos.
Alexandre Penas mostrouse crítico coa xestión do actual executivo municipal e asegurou que os primeiros meses do Partido Popular no goberno local están a supoñer, ao seu xuízo, un empeoramento do funcionamento do Concello. O concelleiro afirmou que a principal liña política de Paula Alvarellos Candia está baseada na improvisación, unha situación que, segundo sostén, provoca que a veciñanza vexa reducidos servizos que considera fundamentais.
Ademais, incidiu na importancia de actuar con previsión nesta materia e lembrou que a prevención e a loita contra os incendios forestais requiren dunha planificación adecuada e dunha execución eficaz para minimizar riscos e protexer o territorio.