O BNG reclama á Deputación unha revisión urxente da estrada LU-P-2906 en Cuíña polo risco de caída de árbores
A edil do BNG de Lugo, Cristina López, levará á área de Infraestruturas da Deputación provincial as reclamacións da veciñanza de Cuíña polo deterioro da estrada LU-P-2906 e o perigo que supón a presenza de árbores en mal estado nas proximidades da calzada.
A formación nacionalista solicitará unha intervención urxente ante os riscos que, segundo advirte, afectan á circulación neste vial, especialmente pola posible caída dunha fila de árbores sobre a estrada. As persoas que utilizan habitualmente esta vía temen que o desprendemento dalgún exemplar poida provocar incidentes e poñer en perigo os vehículos que transitan pola zona.
Cristina López comprometeuse a trasladar estas demandas á administración provincial, responsable da xestión da rede viaria da súa competencia. "Trasladaremos as reclamacións da veciñanza á área de Infraestruturas da Deputación para que execute as medidas necesarias canto antes", afirmou. A concelleira tamén incidiu na importancia de ter en conta as peticións da cidadanía para garantir o correcto mantemento das vías públicas.
Entre as actuacións que reclamará o BNG figura unha inspección técnica inmediata da LU-P-2906 para avaliar o estado das árbores situadas na contorna da estrada e determinar as medidas que cómpre adoptar. En función dos resultados, a formación pide que se proceda á tala dos exemplares que supoñan un perigo ou ao seu acondicionamento preventivo.
A edil reiterou o compromiso do BNG coa seguridade viaria e coa defensa das demandas da veciñanza do rural lucense. Así mesmo, instou á Deputación a responder con rapidez e aplicar as solucións técnicas necesarias para garantir unha circulación segura por esta estrada, que conecta diferentes núcleos de poboación do municipio de Lugo.