O BNG reclama a reparación urxente da pista entre Cuíña e Piúgos tras os danos provocados por unha tala
O Grupo Municipal do BNG reclamará ao Goberno municipal que acometa coa maior brevidade posible a reparación da pista que comunica as parroquias de Cuíña e Piúgos, que presenta un importante deterioro despois dos traballos de tala de árbores realizados na contorna.
Segundo explicou o edil nacionalista Alexandre Penas, o tránsito da maquinaria pesada empregada durante estas tarefas provocou un notable desgaste do firme e deixou danos visibles en diferentes puntos do viario. Unha situación que, segundo sinalou, está a dificultar a circulación e afecta especialmente á veciñanza que emprega habitualmente esta conexión nos seus desprazamentos diarios e para acceder ás vivendas.
Desde o BNG alertan tamén das consecuencias que pode ter manter a pista nestas condicións. O deterioro do pavimento incrementa os riscos para a seguridade viaria, sobre todo durante os días de choiva, cando as malas condicións do firme poden dificultar aínda máis o tránsito. Ademais, consideran que o estado actual da vía pode ocasionar danos nos vehículos que circulan por ela.
A formación nacionalista entende que unha intervención rápida permitiría evitar que o deterioro continúe avanzando e que, como consecuencia, a reparación resulte máis complexa e custosa no futuro.
Por este motivo, o Grupo Municipal do BNG presentou un rogo para instar o Goberno municipal a executar os traballos necesarios para acondicionar o viario e recuperar unhas condicións adecuadas de circulación. Os nacionalistas consideran necesario actuar para garantir unha comunicación segura entre Cuíña e Piúgos, dous núcleos próximos cuxa veciñanza utiliza esta pista de maneira habitual.