O BNG reclama o pulo definitivo da autovía Lugo-Ourense despois de dúas décadas de atrasos
As cabezas de lista do BNG por Lugo e Ourense, Olalla Rodil e Noa Presas, presentaron unha iniciativa conxunta centrada en reclamar a finalización da autovía A-56, a vía que debería conectar ambas as cidades e que levan anos denunciando como unha das grandes materias pendentes do interior de Galicia.
Segundo explican as candidatas, o proxecto acumula máis de vinte anos de atraso, cun grao de execución orzamentaria inferior ao 10 % e apenas 9 quilómetros construídos ata o de agora. Para Presas, esta situación reflicte o que considera un trato desigual cara a estas comarcas por parte das administracións estatais.
Ante a falta desta vía, o tráfico entre ambas as provincias canalízase en boa medida a través de estradas secundarias como a N-540, unha vía que, segundo denuncian, sofre problemas recorrentes de mantemento e soporta un volume elevado de vehículos de transporte de mercadorías, o que repercute tanto na seguridade como nas posibilidades de desenvolvemento económico e social da zona.
O BNG defende que a A-56 debe deixar de ser unha promesa aprazada e pasar a ocupar un lugar prioritario nos orzamentos estatais, ao consideraa esencial para mellorar a conexión entre Lugo e Ourense, acurtar os tempos de viaxe, reforzar a seguridade na estrada e dinamizar a economía e a vertebración do interior galego.
Presas sinalou que, de obter representación no Congreso tras os comicios do 29 de novembro, trasladará esta reivindicación con firmeza a Madrid. Ambas as candidatas subliñan ademais que estas eleccións poderían supoñer un fito, ao ser a primeira vez que o nacionalismo galego acade representación parlamentaria conxunta polas circunscricións de Lugo e Ourense.