O centro de saúde da Fonsagrada mellorará a súa accesibilidade e climatización cun investimento de 169.000 euros
O centro de saúde da Fonsagrada contará cunha actuación de mellora das súas instalacións para reforzar a accesibilidade, a protección fronte ás condicións meteorolóxicas e a eficiencia enerxética. A Xunta de Galicia sacou a licitación estes traballos por un importe de 169.188,25 euros, a través do Portal de Contratos Públicos.
O proxecto contempla a climatización do vestíbulo, das zonas de espera, da circulación principal e dos espazos comúns do edificio. Para iso, instalarase un sistema parcial de climatización mediante tecnoloxía VRF (caudal de refrixerante variable), que permitirá adaptar o funcionamento ás necesidades das distintas zonas.
A intervención tamén inclúe a construción dun soportal exterior para protexer o acceso ao inmoble, así como a mellora da fachada. Con estes traballos preténdese reforzar a protección fronte á choiva e á neve, facilitar a accesibilidade e renovar a estética do edificio.
O contrato establece un prazo máximo de execución de 56 días naturais. A actuación busca, ademais, garantir a continuidade do servizo sanitario, reducir o consumo eléctrico e as emisións asociadas, diminuír os custos de mantemento e aumentar a dispoñibilidade das instalacións.
As empresas interesadas en executar as obras poderán presentar as súas ofertas ata o vindeiro 19 de novembro.