O Centro Sociocultural Paco Pestana de Castroverde mellora os seus medios técnicos cun novo equipamento audiovisual
O Centro Sociocultural Paco Pestana de Castroverde reforzou as súas prestacións coa incorporación dun novo equipamento de son e audiovisual destinado ao salón de actos da instalación. A actuación permitirá mellorar a celebración de actividades culturais, educativas e sociais que se desenvolven habitualmente neste espazo municipal.
Entre o material adquirido inclúense catro altofalantes, unha mesa de son, distintos tipos de micrófonos —de pé, de man e de diadema—, así como un novo proxector para a realización de presentacións, proxeccións e eventos abertos ao público.
A deputada de Cultura, Iria Castro, destacou a importancia desta mellora ao sinalar que, malia tratarse dun edificio inaugurado hai apenas dous anos, non dispoñía ata agora dun equipamento destas características. Segundo explicou, trátase dun recurso esencial para a organización de actos con asistencia de público e para ampliar as posibilidades de uso dun centro chamado a converterse nun referente da actividade cultural en Castroverde.
A adquisición e instalación do material supuxo un investimento total de 10.000 euros. A Vicepresidencia da Deputación de Lugo colaborou na iniciativa cunha achega de 7.000 euros a través da área de Cultura, mentres que o Concello asumiu o importe restante.