O Club de Lectura de Lugo trasladará o seu próximo encontro ao aeródromo de Rozas
O Club de Lectura de Lugo organizará o vindeiro sábado 3 de outubro un encontro literario no aeródromo de Rozas, nunha sesión especial que sairá dos espazos habituais da entidade para achegar a lectura ao mundo da aviación. A actividade, que comezará ás 12:00 horas, contará coa colaboración do Real Aeroclub de Lugo e estará centrada no libro 'Al oeste con la noche', da escritora e aviadora Beryl Markham.
A elección deste escenario responde á ambientación da obra, que relata experiencias relacionadas cos voos, as viaxes e as aventuras. Deste xeito, os participantes poderán conversar sobre a lectura nun espazo vinculado ao universo dos avións e os pilotos, nunha xornada que combinará literatura e aviación.
O encontro permitirá compartir impresións sobre o libro e abrir un diálogo arredor das experiencias e historias que conectan ambos os ámbitos. Desde o Club de Lectura de Lugo animan a todas as persoas interesadas en participar nesta proposta a inscribirse previamente a través do correo electrónico clubdelecturalugo@gmail.com.