O COAG Lugo organiza un debate electoral sobre a vivenda cos candidatos do PSOE, BNG e PP

A Delegación de Lugo do Colexio Oficial de Arquitectos de Galicia (COAG) organizará o próximo mércores 25 de novembro un debate electoral sobre a vivenda no que participarán representantes das candidaturas do PSOE, BNG e PP ao Congreso dos Deputados polas eleccións xerais do 29 de novembro. A cita terá lugar ás 20:30 horas na Casa do Saber de Lugo, situada na praza Pío XII, e estará moderada pola presidenta do COAG Lugo, Carmen Figueiras.
No debate intervirán Jorge Bustos, candidato número dous do PSdeG-PSOE ao Congreso por Lugo; Iago Suárez, número dous da candidatura do BNG; e Jaime de Olano, candidato número tres do PP. O encontro estará aberto á cidadanía, con entrada libre ata completar a capacidade do recinto.
O obxectivo da iniciativa é que os candidatos poidan expoñer as súas propostas sobre os principais retos da vivenda na provincia. Entre as cuestións que se abordarán figuran as dificultades de acceso, a situación do mercado inmobiliario provincial, a rehabilitación, a vivenda baleira e o reto demográfico. Tamén se tratarán aspectos relacionados co planeamento urbanístico, a xestión administrativa e a calidade arquitectónica.
En canto aos participantes, Jorge Bustos é enxeñeiro civil e foi concelleiro de Urbanismo, Deportes e Xuventude no Concello de Lugo. Na actualidade é edil do PSOE na oposición municipal. Pola súa banda, Iago Suárez é deputado no Parlamento de Galicia, candidato á Alcaldía de Chantada e secretario xeral da Unión da Mocidade Galega (UMG).
Jaime de Olano é avogado e deputado no Congreso desde 2011, onde asumiu diferentes responsabilidades. Forma parte da Deputación Permanente desde 2018 e foi integrante do Consello de Dirección do Grupo Parlamentario Popular entre 2018 e 2019 e desde 2021. Na actual lexislatura exerce como voceiro adxunto do grupo. Ademais, pertence á Xunta Directiva nacional do PP desde 2011 e foi vicesecretario nacional entre 2019 e 2021. Tamén foi concelleiro en Viveiro entre 2011 e 2019.