Sociedade

A iniciativa municipal ofrecerá entre xuño e xullo formación en alimentación saudable, hábitos de vida activos e actividade física para toda a cidadanía

O Concello de Lugo continuará impulsando o programa municipal +XTi coa posta en marcha de novos cursos gratuítos centrados na nutrición, os hábitos saudables, a hixiene alimentaria e o deporte. A iniciativa desenvolverase entre os meses de xuño e xullo a través de catro accións formativas dirixidas á cidadanía co obxectivo de promover estilos de vida saudables e fomentar o benestar físico.

A programación comezará co módulo “Etiquetaxe e normas básicas de hixiene na cociña”, que se impartirá os días 3 e 5 de xuño cunha duración total de 10 horas. A continuación celebrarase o módulo de “Nutrición”, previsto para os días 6, 10, 12, 13 e 17 de xuño, cun total de 25 horas formativas.

Posteriormente desenvolveranse os talleres prácticos de “Nutrición e receitas saudables”, que terán lugar os días 19, 20, 26 e 27 de xuño, así como o 1, 3, 4 e 8 de xullo. Esta actividade contará cunha carga lectiva de 40 horas e estará centrada na elaboración de receitas e na adquisición de coñecementos prácticos sobre alimentación equilibrada.

A programación completarase co módulo de “Deporte”, que se celebrará os días 10, 11, 15, 17, 18, 22 e 24 de xullo cunha duración total de 35 horas.

As actividades impartiranse os mércores e venres en horario de 16:00 a 21:00 horas, mentres que os sábados desenvolveranse entre as 9:30 e as 14:30 horas.

Os módulos relacionados coa nutrición e a alimentación terán lugar nas instalacións de GDoce, situadas na rúa da Agricultura número 106, no Polígono do Ceao. Pola súa banda, o módulo deportivo desenvolverase na Casa da Xuventude e en diferentes espazos ao aire libre da cidade.

Desde o Concello de Lugo lembran ademais que os distintos módulos son complementarios, polo que unha mesma persoa poderá participar en todos eles se así o desexa.

Co fin de facilitar os desprazamentos das persoas participantes, o Concello poñerá á disposición da cidadanía as liñas de bus 1.1, 1.2 e 1.3 os mércores e venres, así como as liñas 1.2 e 1.4 durante os sábados.