O Concello de Lugo prepara unha intervención para mellorar o aparcadoiro provisional do HULA
O Concello de Lugo deu os primeiros pasos para acometer unha mellora do aparcadoiro provisional situado nas inmediacións do Hospital Universitario Lucus Augusti (HULA), un espazo empregado a diario por pacientes, familiares e profesionais sanitarios.
A alcaldesa, Elena Candia, visitou os terreos acompañada polos concelleiros Antonio Ameijide e María Reigosa co obxectivo de comprobar sobre o terreo o estado actual da zona e coñecer os detalles da actuación que se está a preparar desde os servizos municipais.
Segundo explicaron desde o executivo local, xa se encargou unha solución técnica destinada a consolidar a superficie do aparcadoiro e corrixir as deficiencias que presenta. Entre os principais problemas detectados figuran a escasa consistencia do firme e as dificultades de drenaxe, circunstancias que favorecen a aparición de fochancas e a acumulación de auga, especialmente durante os períodos de choiva.
O goberno municipal considera necesario actuar con rapidez para mellorar as condicións dun espazo que soporta unha elevada afluencia de vehículos e que, segundo sinala, leva tempo precisando actuacións de conservación. O estado actual da superficie provoca incomodidades aos usuarios e pode afectar tanto á circulación como ao estacionamento dos vehículos.
Desde o Concello destacan que a situación urbanística do ámbito permite agora desenvolver este tipo de intervencións, polo que os traballos poderán executarse unha vez rematados os trámites técnicos e administrativos.
Os servizos municipais ultiman nestes momentos a redacción do proxecto, que será licitado proximamente. O obxectivo é executar as obras no menor prazo posible para ofrecer unha solución máis segura, cómoda e funcional ás persoas que utilizan este aparcadoiro vinculado ao complexo hospitalario lucense.