O Concello informa á veciñanza do Castiñeiro dos avances para eliminar o tapón de Dona Urraca
O Goberno local continúa avanzando en dúas das actuacións urbanísticas máis demandadas no barrio do Castiñeiro: a eliminación do coñecido tapón urbanístico de Dona Urraca e a prolongación da rúa Evaristo Correa Calderón. Ambos proxectos buscan mellorar a mobilidade, recuperar espazos degradados e facilitar a conexión entre distintas zonas do barrio, dando resposta a reivindicacións veciñais históricas.
No caso da actuación en Dona Urraca, o Concello está a tramitar a demolición da vivenda deshabitada situada no cruzamento desta rúa con Mazaira e López Guntín, un inmoble que estreita a calzada e dificulta tanto o tránsito de vehículos como o paso de peóns. O contrato establece que os traballos de derrubo deberán comezar de maneira inmediata unha vez se formalice a adxudicación, aínda que a intervención precisará dun tratamento específico debido á presenza de fibrocemento na cuberta do edificio.
En canto á prolongación da rúa Evaristo Correa Calderón, o Executivo municipal traballa para facer realidade a apertura dun novo vial na zona comprendida entre as rúas Evaristo Correa Calderón, Amizade e Escultor Asorey. A actuación afectará a un total de 15 parcelas e permitirá crear unha nova conexión viaria, humanizar o espazo e favorecer o desenvolvemento urbanístico dunha contorna que leva anos sen transformarse.
Estes avances foron trasladados pola alcaldesa de Lugo, Elena Candia, durante unha reunión mantida no Centro Social da Praza do Castiñeiro coa veciñanza do barrio. No encontro participou tamén o concelleiro de Urbanismo, Ramón Cabarcos, xunto con outros integrantes do equipo de goberno.
Durante a reunión, a rexedora lembrou que a prolongación da rúa Evaristo Correa Calderón é unha demanda histórica da veciñanza e recordou que no ano 2022 un grupo de residentes impulsou unha recollida de sinaturas para reclamar a execución dun proxecto que levaba anos paralizado. Candia asegurou que o actual Goberno local aposta por manter un contacto directo cos veciños para informar da evolución destas actuacións e avanzar na resolución de problemas pendentes desde hai tempo.
A alcaldesa sinalou que o obxectivo é transformar unha zona actualmente degradada, con solares abandonados, nun espazo plenamente integrado no barrio, dotado de novas conexións, beirarrúas, iluminación e servizos.
No transcurso do encontro tamén se informou de que o Concello solicitará a cesión do parque infantil das Casas Sindicais para incorporalo ao patrimonio municipal e asumir directamente o seu mantemento, co propósito de mellorar o estado das instalacións e garantir a súa correcta conservación para o uso das familias.