O Conservatorio Profesional de Danza de Lugo celebrará as súas galas de clausura os días 11 e 12 de xuño
O Conservatorio Profesional de Danza de Lugo celebrará os días 11 e 12 de xuño as galas de clausura do curso académico, unhas citas nas que o alumnado mostrará o traballo desenvolvido ao longo do ano nas distintas especialidades de danza.
A primeira das funcións terá lugar o xoves 11 de xuño ás 19:30 horas e estará a cargo do alumnado de Grao Elemental, que presentará o espectáculo “Disney Danza”, unha proposta pensada para todos os públicos e inspirada en coñecidas películas de animación.
Pola súa parte, o venres 12 de xuño, tamén ás 19:30 horas, celebrarase a gala do Grao Profesional do CDAN. Nesta sesión, o alumnado de Danza Clásica interpretará unha versión de “La Fille mal gardée”, mentres que o grupo de danza contemporánea porá en escena “Cores”.
A programación complétase cunha coreografía do Obradoiro de Danza Galega e coa presentación dun traballo creado polo alumnado de 6º curso, que conclúe este ano a súa formación profesional.
O Concello de Lugo destacou o seu apoio a estas galas e ao labor educativo e cultural do conservatorio, unha institución de referencia na cidade e en Galicia. O concelleiro Javier Vázquez reafirmou o compromiso municipal co impulso da danza como disciplina artística e formativa, subliñando o talento do alumnado e o traballo do profesorado.