O gas radón e os seus efectos na saúde, protagonistas dunha conferencia na Deputación de Lugo

GaliciaXa | LugoXa
A doutora en Epidemioloxía e Saúde Pública Lucía Martín de Bernardo Gisbert analizará este mércores os riscos da exposición prolongada a este elemento radioactivo natural, especialmente presente en Galicia
fachada-Deputación-de-Lugo-portada
17 Nov 2026

O salón de actos do Pazo de San Marcos acollerá este mércores 18 de novembro, ás 19:00 horas, unha conferencia sobre os efectos do gas radón na saúde, dentro da programación da XXXVII edición das Xornadas Luis Asorey. A sesión será impartida por Lucía Martín de Bernardo Gisbert, doutora en Epidemioloxía e Saúde Pública e profesora da Universidade de Santiago de Compostela (USC), que abordará os riscos asociados á exposición prolongada a este gas radioactivo de orixe natural.

Galicia é unha das comunidades máis expostas ao radón debido ás características xeolóxicas do seu solo. Na provincia de Lugo, o 11 % das 651 vivendas nas que se realizaron medicións supera os 300 Bq/m³, o nivel de referencia establecido para os espazos interiores, segundo un estudo publicado en 2025 na revista científica 'Indoor Air'. Na cidade de Lugo, a porcentaxe sitúase no 8 % das 171 vivendas analizadas. Ademais, 56 dos 67 municipios lucenses están incluídos nas zonas de actuación prioritaria fronte ao radón, segundo a clasificación do Consello de Seguridade Nuclear.

Este gas xérase de forma natural no subsolo e pode penetrar nas vivendas a través de gretas e outras aberturas, acumulándose especialmente nos espazos pechados e pouco ventilados. A exposición prolongada a concentracións elevadas aumenta o risco de desenvolver cancro de pulmón, polo que resulta importante coñecer a súa presenza e adoptar medidas para reducir a exposición.

A ciencia detrás dos remedios naturais

A conferencia enmárcase nas XXXVII Xornadas Luis Asorey, patrocinadas pola Deputación de Lugo e organizadas pola Real Academia Galega de Ciencias baixo o título 'A medicina natural: de remedios tradicionais a evidencias científicas'. O ciclo analiza as posibilidades terapéuticas dos recursos naturais e o fundamento científico das súas aplicacións no ámbito da saúde.

O programa comezou o pasado 9 de novembro con sesións dedicadas á fitoterapia, a cura balnearia e o potencial medicinal dos compostos mariños das microalgas. Nas xornadas dos días 16 e 17 abordáronse tamén a micoterapia e o cultivo e comercialización de plantas medicinais.

Tras a conferencia sobre o radón, o ciclo pecharase o xoves 19 de novembro coa intervención de Mercedes Rois Díaz, doutora en Enxeñaría de Montes e fundadora e CEO de Raíces-Reconecta contigo, que analizará a relación entre os espazos forestais e a saúde a través dos baños de bosque.

As sesións celébranse no salón de actos do Pazo de San Marcos, en horario de 19:00 a 21:00 horas. A participación é gratuíta e pode ser presencial ou en liña, a través da canle de YouTube do Servizo de Audiovisuais da Deputación.

0.15320181846619