O lucense Óscar Rodríguez, elixido mellor orador de España
Melilla foi escenario da fase final da liga Española de Debate Universitario (LEDU), que congregou aos 16 mellores equipos de debate das universidades españolas que obtiveron a súa praza en torneos clasificatorios celebrados ao longo do último ano. O lucense Óscar Rodríguez participaba na competición co seu equipo da Universidade Carlos III de Madrid. O xurado, presidido por Albert Rivera (antigo participante da liga universitaria e embaixador da LEDU) elixiu aos dous mellores oradores valorados ao longo da competición. Ambos tiveron que articular o último día un discurso de cinco minutos de duración sobre o tema “O noso modelo de vida fainos felices?”.
Por sorteo a Óscar tocoulle defender a postura a favor. Finalmente, o lucense resultou elixido Mellor Orador da liga. Ademais do trofeo acreditativo, entregado por Jesús Romero Imbroda, deputado do Goberno de Melilla, recibiu como premio distintas bolsas, artigos dixitais ou billetes para desprazamentos en avión e tren. Dáse a circunstancia de que, á marxe da Liga de Debate Universitario, Óscar Rodríguez está clasificado para a fase final do Campionato do Mundo de Oratoria, que se disputará o 17 de 0utubro en Bos Aires (Arxentina). Ese día enfrontarase en semifinais a Stefanía Fossa da Universidade de Belgrano.
O vencedor dese enfrontamento disputará a final fronte ao vencedor da outra semifinal, á que chegaron o tamén español Alberto García Chaparro da Pontificia de Comillas e Stefanny Gamarra da Universidade Nacional Maior de San Marcos de Perú). Este ano, clasificáronse entre os 16 mellores equipos de debate os das universidades de Alcalá -vixente campioa-, Carlos III, Esade, Selecta, Illes Balears, Instituto de Estudos Bolsistas (IEB), Instituto Superior de Dereito e Economía (ISDE), Xaén, País Vasco, Pompeu Fabra, Pontificia Comillas, Salamanca e Vigo.
Foi precisamente a Universidade de Vigo a que se alzou co título, cun equipo formado por por Iván Fernández, Tomás Aparicio, Jesús Gómez, Inés Tunes e a súa preparadora Laura Bacariza. O equipo da Universidade de Vigo impúxose na final a un equipo da Universidade Carlos III. Como premio, o equipo gañador recibe trofeo e 6.000 euros. A Liga Española de Debate Universitario, competición pioneira en España, foi creada no ano 2000. Nestes anos a LEDU consolidouse como ponte entre universidades e empresas, e como escaparate do talento novo para algunhas das principais compañías do país, como aliadas para potenciar as súas capacidades e oportunidades.