O Museo Provincial de Lugo reúne a 33 artistas e a comunidade educativa nunha exposición colectiva sobre o Alzheimer
O Museo Provincial de Lugo abre as súas portas á exposición colectiva 21S(empre), un proxecto artístico colaborativo que ten como eixo central a enfermidade do Alzheimer e que poderá visitarse na sala Multiusos do centro ata o próximo 30 de outubro.
A mostra é o resultado da colaboración entre 33 artistas, asociacións de familiares e de persoas con Alzheimer, así como a comunidade educativa do IES Alfoz-Valadouro. A proposta integra diferentes olladas e disciplinas artísticas co obxectivo de dar visibilidade á realidade que viven quen cohabitan con esta enfermidade, tanto os propios afectados como os seus contornos familiares.
No acto de inauguración participaron a xestora da Rede Museística e comisaria da exposición, Encarna Lago; a tamén comisaria Silvia Fiallega; e a directora do Museo Provincial de Lugo, Aurelia Balseiro, xunto coa representante institucional da Deputación de Lugo na área de Cultura, Iria Castro.
Durante o evento subliñouse o papel da Rede Museística á hora de poñer o foco en problemáticas sociais de calado, empregando a creación artística como ferramenta de denuncia e reivindicación. Neste caso, a expresión artística actúa como altavoz da situación das persoas con Alzheimer e as súas familias, e como instrumento para reclamar dereitos e dignidade.
Así mesmo, incidiuse na responsabilidade que teñen as institucións públicas de garantir o acceso aos tratamentos sanitarios en condicións de igualdade para toda a cidadanía, poñendo en valor a sanidade pública como pilar fundamental de protección social.
A exposición permanecerá aberta ao público na sala Multiusos do Museo Provincial de Lugo ata o 30 de outubro.