O Outlet de Outono de Lugo Monumental reúne 16 comercios e seis entidades sociais na Praza Maior
A Praza Maior de Lugo acolle os días 14 e 15 de outubro unha nova edición do Outlet de Outono organizado pola Asociación Lugo Monumental, no que participan 16 establecementos comerciais e seis entidades sociais. A proposta permite adquirir produtos de calidade a prezos rebaixados e ofrece tamén un espazo para dar visibilidade ao labor de diferentes asociacións.
A actividade desenvólvese nas casetas instaladas ao fondo da praza e conta coa colaboración do Concello de Lugo, a través da área de Cultura, que cedeu estes espazos para facer posible a iniciativa.
Os postos estarán abertos en horario de mañá, de 11:00 a 14:00 horas, e de tarde, de 17:00 a 20:30 horas, durante as dúas xornadas. Os visitantes poderán atopar produtos de fin de tempada con importantes descontos.
Como novidade, esta edición incorpora unha zona social na que participarán a Protectora de Animais e Plantas, a Asociación Española Contra o Cancro, Down Lugo, Raiolas e Michos. Estas entidades disporán de postos para dar a coñecer os seus proxectos e, nalgúns casos, ofrecer produtos destinados a recadar fondos para financiar a súa actividade.
Con esta convocatoria, Lugo Monumental busca impulsar o comercio local e facilitar ao público o acceso a artigos a prezos máis económicos, ao tempo que abre un espazo de participación para o tecido asociativo da cidade.