O pianista Davit Khrikuli ofrecerá un concerto no Círculo das Artes de Lugo
Este xoves, 16 de abril, o pianista Davit Khrikuli ofrecerá un concerto no Círculo das Artes de Lugo a partir das 20.00 horas no marco dunha nova actividade organizada pola Sociedade Filarmónica de Lugo.
O programa do concerto incluirá pezas de destacados compositores da historia da música clásica. Así, interpretará obras de Alexander Scriabin, como dous preludios do Opus 11, “Enigma” Op. 52 nº 2, “Danse Languide” Op. 51 nº 4, dúas danzas do Opus 73 e a Sonata número 10 en do maior, Op. 70.
A actuación completarase con composicións de Franz Liszt, entre elas “Après une lecture du Dante: Fantasia quasi Sonata”, así como con varias pezas de Frédéric Chopin, como a Polonesa Op. 44 en fa sostido menor, o Valse Op. 64 nº 1 en re bemol maior, a Mazurca Op. 56 nº 3 en do menor e a Sonata número 3 Op. 58 en si menor.
Nado en Xeorxia no ano 2001, Khrikuli está considerado como unha das figuras máis prometedoras da súa xeración. O músico foi finalista do Concurso Internacional de Piano Frederic Chopin 2025, celebrado en Varsovia e recoñecido como un dos certames máis prestixiosos do mundo, onde as súas interpretacións chamaron poderosamente a atención tanto do xurado como do público. Ao longo da súa traxectoria, tamén foi distinguido en diversos concursos internacionais, entre eles o Primeiro Premio no Concurso Internacional de Piano Cidade de Vigo 2024.