O PP pide a aprobación definitiva dos tramos pendentes da autovía entre Lugo e Ourense
O pasado 15 de xaneiro de 2025, os deputados ourensáns do PP Celso Delgado, Ana Vázquez e Rosa Quintana rexistraron varias preguntas dirixidas ao Goberno sobre os tramos que aínda non están en obras da autovía A-56 entre Ourense e Lugo.
Ata agora, a autovía só ten, desde setembro de 2020, un tramo en servizo, que é o que vai desde A Barrela (Carballedo) ata San Martiño (Villamarín), de 8,8 km (8,3 km na provincia de Lugo e 0,5 km en Ourense). Un tramo que, denuncian, “quedou illado e, por tanto, sen funcionalidade”.
Nas súas preguntas, os deputados populares pedían coñecer “cando será aprobado de forma definitiva polo Ministerio de Transportes e Mobilidade Sostible o proxecto de construción, Autovía A-56, Lugo-Ourense”, referíndose aos tramos entre Quintela e A Casilla. Pedían saber, ademais, “en que data serán licitadas polo Mitma as obras do citado tramo da Variante de Ourense”.
A resposta do Goberno chegou o 3 de marzo e, nela, o Ministerio aseguraba que “a Dirección Xeral de Estradas do Ministerio de Transportes e Mobilidade Sostible se encontra redactando o proxecto de construción do tramo Quintela – A Casilla, que dará continuidade ao tramo Eirasvedras-Quintela, cuxas obras actualmente se están priorizando neste corredor. Unha vez aprobado o proxecto, a licitación das obras virá condicionada polas dispoñibilidades orzamentarias do momento e a priorización de actuacións no conxunto da Rede de Estradas do Estado”.
Os populares lembran que o BOE do 28 de decembro de 2023 publicou o Anuncio da Demarcación de Estradas do Estado en Galicia polo que se daba conta da Resolución do Ministerio de Transportes e Mobilidade Sostible pola que se aprobaba provisionalmente e se ordenaba a incoación do expediente de Información Pública e Oficial do proxecto de construción "Autovía A-56, Lugo-Ourense. Variante de Ourense. Tramo: Enlace de Quintela coa N-120 no seu p.k. aprox. 572+000 – enlace de Casilla coa N-525 no seu p.k. 241+200" Provincia de Ourense.
Ademais, declaraba a urxencia do proxecto polo que o citado trámite tería o carácter de información pública previa á declaración de urxente ocupación dos bens e dereitos afectados pola execución do proxecto.
Desde aquela data, denuncian, “xá transcorreron máis de 15 meses e o Goberno segue sen dar data de aprobación definitiva do proxecto de construción nin tampouco compromete data algunha de licitación de obras no presente ano 2025”.
Respecto ao tramo A Casilla-Cambeo, o Ministerio asegura que “a Dirección Xeral de Estradas do Ministerio de Transportes e Mobilidade Sostible se encontra redactando o proxecto de construción”, pero desde o PP denuncian que “transcorreron xa máis de 24 meses desde a aprobación do expediente de información pública e do proxecto de trazado e aínda segue sen concluír a redacción do citado proxecto de construción” e consideran que se trata “dunha demora excesiva”.
O mesmo, sinalan desde o PP, acontece co tramo entre Cambeo e San Martiño. Por iso, cuestionan o motivo polo cal “habendo iniciado en xullo de 2022 a resolución do contrato de redacción do proxecto do tramo Cambeo-Sanmartiño da Autovía A-56 (Ourense-Lugo), siga hoxe en día sen concluir ese sinxelo procedemento administrativo”. O Goberno, por súa parte, asegura que “non se pode concretar unha data de licitación do novo contrato, as licitacións dependen das dispoñibilidades orzamentarias do momento e a priorización de actuacións no conxunto da Rede de Estradas do Estado”, o que, para os populares, demostraría que “o Goberno de Pedro Sánchez decidiu non executar este tramo, o que constitúe ademais unha afrenta á nosa provincia”.