O programa 'Arte e Saúde' chega xa a 280 persoas da Coruña e Lugo
O programa 'Arte e Saúde', promovido polo Centro de Arte Fundación María José Jove co apoio da Fundación Banco Sabadell e da Xunta de Galicia, amplía este ano o seu alcance social coa incorporación da provincia de Lugo ao seu ámbito de actuación. A iniciativa, creada para mellorar a calidade de vida de persoas en situación de vulnerabilidade ou con diversidade funcional, fixo balance da súa actividade nos cinco primeiros meses do ano, nos que participaron 280 persoas das provincias da Coruña e Lugo.
O proxecto naceu en 2019 e foi deseñado en colaboración coa Asociación Participa. A súa metodoloxía emprega a cultura, a creación artística e o contacto directo coa Colección de Arte do centro como ferramentas para favorecer o desenvolvemento persoal, a cohesión social e o benestar emocional dos participantes.
A través dun equipo integrado por profesionais de diferentes disciplinas, 'Arte e Saúde' combina obradoiros presenciais e propostas a distancia. As actividades buscan reforzar capacidades básicas, como a mobilidade ou a atención, e traballar outros aspectos vinculados á xestión das emocións, a autonomía persoal e a convivencia en comunidade.
Durante este inicio de ano, a actividade presencial na sede do Centro de Arte Fundación María José Jove estruturouse arredor de sesións didácticas semanais, nas que a colección artística funciona como espazo de encontro e relación. Tamén se desenvolveron encontros específicos dirixidos a pacientes derivados polo servizo de Saúde Mental do Sergas.
O programa traballa en coordinación con doce entidades da Coruña e Lugo, o que lle permite ofrecer un acompañamento próximo aos usuarios e crear contornas seguras nas que avanzar no seu benestar. Ademais, para superar as dificultades de desprazamento no rural, conta cun Programa de Participación Social a Distancia, baseado en cadernos de actividades e materiais didácticos adaptados.
No primeiro trimestre de 2026, esta rede a distancia chegou a 57 centros activos, dos que 50 están na provincia da Coruña e 7 en Lugo. En total, distribuíronse 22 cadernos didácticos, 19 na Coruña e 3 en Lugo, destinados a residencias e centros de día.
A iniciativa complétase coa liña de Integración Activa, orientada a promover a participación compartida entre colectivos en risco de exclusión e público xeral, reforzando así o papel da arte como ferramenta de inclusión e transformación social.