O PSdeG esixe desbloquear o Museo da Romanización e declaralo proxecto estratéxico
A deputada socialista Lara Méndez reclamou no Parlamento de Galicia que o Goberno autonómico deixe de frear o proxecto do Museo da Romanización de Galicia, unha iniciativa que, segundo denunciou, leva máis dunha década sen avances significativos. A parlamentaria solicitou ademais que a actuación sexa declarada proxecto industrial estratéxico co obxectivo de acelerar os trámites administrativos, mellorar a coordinación entre institucións e garantir o compromiso da Xunta coa súa execución.
Méndez destacou que o museo tería un importante impacto cultural, turístico e económico non só para a cidade de Lugo, senón para o conxunto de Galicia. Entre as súas vantaxes, sinalou a posibilidade de reunir nun único espazo máis de 15.000 pezas catalogadas que actualmente permanecen distribuídas en distintas dependencias públicas e privadas. Ademais, encadrou a iniciativa dentro dun proxecto máis amplo para poñer en valor o patrimonio da antiga Galaecia romana e castrexa, convertendo o museo no eixo dun itinerario cultural capaz de conectar vías históricas, cidades e monumentos e reforzar o atractivo turístico da comunidade.
Durante a súa intervención, a deputada repasou a traxectoria dunha proposta que se remonta a hai tres décadas, cando o pleno do Concello de Lugo acordou transformar o cuartel de San Fernando nun equipamento cultural. Posteriormente, o inmoble foi adquirido pola administración local para facer posible a súa reconversión.
A socialista recoñeceu que a Xunta impulsou actuacións relevantes entre 2009 e 2010, como a realización de catas arqueolóxicas, a convocatoria dun concurso de ideas e mesmo o anuncio dun investimento de 10 millóns de euros. Porén, asegurou que a partir de 2013 o proxecto quedou paralizado.
Segundo indicou, desde aquela apenas se produciu un avance relevante: a incorporación dunha partida de 500.000 euros nos Orzamentos da Xunta para 2025 grazas a unha emenda presentada polo PSdeG. Con todo, criticou que esa contía non chegou a executarse. Tamén cuestionou a existencia dunha nova dotación económica da mesma cantidade nos presupostos actuais, sobre a que asegurou que non existen novidades. “Que está a facer a Xunta? Nada”, afirmou.
Méndez comparou esta situación co apoio económico concedido polo Executivo galego a outros proxectos culturais noutras cidades, citando máis de 11 millóns de euros para a adquisición e rehabilitación do Teatro Fraga en Vigo, 17 millóns para o pazo de Lourizán en Pontevedra e 12 millóns para o museo do modernismo en Ferrol, mentres que, ao seu xuízo, en Lugo non se está a impulsar ningunha actuación semellante.
A iniciativa defendida pola parlamentaria inclúe tamén a execución inmediata das partidas orzamentarias xa consignadas en colaboración co Concello de Lugo, a elaboración dun calendario público e concreto para a rehabilitación do edificio e a apertura do museo, o establecemento dun compromiso de financiamento plurianual que permita completar o proxecto, a coordinación entre as distintas consellerías implicadas e a administración local para asegurar a súa viabilidade técnica, económica e administrativa, así como o recoñecemento do Museo da Romanización como unha actuación estratéxica para a conservación e promoción do patrimonio cultural galego.