O PSdeG propón un servizo municipal para o baleirado de fosas sépticas nas parroquias sen saneamento
O Grupo Municipal Socialista de Lugo defenderá no vindeiro pleno ordinario de setembro a creación dun servizo municipal de baleirado de fosas sépticas baixo demanda destinado ás parroquias que aínda non dispoñen de rede de saneamento. A proposta, presentada polo portavoz socialista, Miguel Fernández, busca ofrecer unha solución práctica ás necesidades actuais da veciñanza mentres continúa o proceso de ampliación das infraestruturas de saneamento no municipio.
Segundo explicou Fernández, Lugo conta cun dos termos municipais máis extensos de Galicia e cun elevado número de núcleos rurais dispersos, unha realidade que dificulta a implantación inmediata dunha rede integral de saneamento. Neste contexto, considera necesario combinar a planificación a longo prazo con medidas que dean resposta aos problemas cotiáns das familias que dependen de fosas sépticas.
A iniciativa contempla que as persoas propietarias de vivendas poidan solicitar o baleirado das súas fosas a través do Concello, que sería o encargado de organizar e programar periodicamente o servizo. Os traballos realizaríanse mediante vehículos cisterna da empresa concesionaria, encargándose posteriormente do traslado dos residuos á planta de tratamento de EDER, especializada na súa correcta xestión conforme á normativa ambiental.
Para o portavoz socialista, este sistema permitiría ofrecer un servizo máis accesible e eficiente, ao tempo que contribuiría a evitar vertidos incontrolados con posibles consecuencias para o solo, os acuíferos e os cursos fluviais. Ademais, sostén que a medida facilitaría un mellor aproveitamento dos recursos públicos xa existentes, coordinando a recollida coa infraestrutura de depuración dispoñible.
Miguel Fernández tamén propón que o servizo se regule mediante un prezo público que resulte asumible para a cidadanía, de maneira que todas as economías familiares poidan acceder a el en condicións adecuadas.
O portavoz socialista insistiu en que esta iniciativa non pretende substituír a extensión da rede de saneamento, senón ofrecer unha resposta transitoria mentres continúan executándose as actuacións previstas. Ao seu xuízo, ambas medidas son compatibles e necesarias para garantir unha mellor calidade de vida nas parroquias do municipio.
Finalmente, Fernández defendeu un modelo de xestión baseado na planificación e na procura de solucións realistas ás necesidades do rural, apostando por dotar á veciñanza de servizos públicos eficaces que respondan aos problemas do día a día.