O PSOE de Lugo reivindica en Paradai as obras de renovación da rede de auga e reclama novas actuacións
O portavoz do Grupo Municipal Socialista, Miguel Fernández, visitou o barrio de Paradai para comprobar a evolución das obras de renovación da rede de abastecemento na rúa Alexandre Bóveda, unha intervención impulsada durante a súa etapa como alcalde e integrada no programa municipal de modernización das infraestruturas hidráulicas e eliminación progresiva das conducións de fibrocemento na cidade.
Durante a visita, Fernández estivo acompañado por veciños e veciñas da zona e por representantes do movemento asociativo do barrio, cos que percorreu distintos puntos de Paradai co obxectivo de avaliar o avance dos traballos e recoller as principais demandas da contorna.
O portavoz socialista puxo en valor que a actuación que se está executando responde, segundo indicou, a un modelo de cidade baseado na planificación e na mellora das infraestruturas básicas. Neste sentido, asegurou que se trata de proxectos que non xurdiron da improvisación, senón dunha programación previa do anterior goberno local.
Fernández lembrou que a renovación da rede de abastecemento forma parte dun plan máis amplo que permitiu actuar sobre quilómetros de tubaxes antigas, reducindo avarías e mellorando o funcionamento do sistema, ao tempo que se avanza na substitución do fibrocemento.
Ao longo do encontro coa veciñanza tamén se abordaron outras necesidades do barrio relacionadas coa mobilidade, o mantemento dos espazos públicos e novas intervencións pendentes. O portavoz socialista comprometeuse a trasladar estas demandas ao goberno municipal para que sexan incluídas na planificación do presente exercicio.
Neste contexto, Fernández criticou a xestión do executivo local e asegurou que o actual goberno está a continuar proxectos herdados sen presentar, ao seu xuízo, unha folla de ruta propia para os barrios da cidade.
O representante socialista confirmou que o grupo manterá a súa presenza nos distintos barrios de Lugo para escoitar á cidadanía e fiscalizar a acción do goberno local, defendendo que a política debe basearse no contacto directo coa veciñanza e na asunción de compromisos reais.
Finalmente, trasladou unha mensaxe aos residentes de Paradai, aos que garantiu que o PSdeG seguirá reclamando a execución das actuacións pendentes no barrio e advertiu de que, se non se levan a cabo, estas demandas serán priorizadas no futuro. Segundo indicou, Paradai precisa investimentos, planificación e continuidade nas melloras urbanas.