O PSOE reclama a Candia que acelere o aparcadoiro de camións das Gándaras e concrete a súa posta en funcionamento
O Grupo Municipal Socialista reclama ao Goberno de Elena Candia que acelere os trámites para facer realidade o aparcadoiro de vehículos pesados previsto nas Gándaras e que concrete os prazos para a súa posta en funcionamento. O concelleiro Jorge Bustos considera que a infraestrutura debe responder a unha demanda que, segundo sinala, leva anos trasladando o sector do transporte e as empresas dos polígonos industriais de Lugo.
Bustos defende que o estacionamento debe converterse canto antes nun servizo operativo e critica que unha actuación que considera necesaria para mellorar as condicións de actividade de O Ceao-As Gándaras siga pendente de execución. "Non podemos permitir que unha infraestrutura necesaria para as nosas empresas siga acumulando atrasos mentres outros polígonos industriais avanzan e melloran os seus servizos", afirma.
O proxecto contempla a habilitación dun espazo de 44.369 metros cadrados en terreos municipais das Gándaras. A concesión, anunciada polo Concello en abril de 2026, establece un período de dez anos e fixa un prazo máximo de 18 meses desde a formalización do contrato para que a empresa adxudicataria redacte o proxecto, obteña as autorizacións necesarias e execute os traballos. A actuación será asumida integramente pola concesionaria, sen investimento municipal directo.
Segundo as condicións previstas, o estacionamento deberá funcionar durante todo o ano e reservar polo menos o 20 % das prazas para vehículos en tránsito. Tamén deberá cumprir os requisitos de seguridade correspondentes. As tarifas máximas establecidas son de 80 euros mensuais para persoas usuarias abonadas e de 1 euro por hora para os estacionamentos ocasionais.
O edil socialista lembra que a proposta foi traballada durante o anterior mandato municipal en colaboración con transportistas e empresarios. Nese período, o Goberno local abordou cos colectivos a necesidade de habilitar un recinto específico, acoutado e vixiado, que permitise ofrecer unha alternativa para o estacionamento dos vehículos pesados.
Para Bustos, o seguinte paso debe ser completar a tramitación e evitar que a iniciativa se prolongue máis no tempo. "O sector non necesita máis anuncios nin reunións. Necesita saber cando vai poder utilizar o aparcadoiro e contar cun servizo que é fundamental para a actividade diaria das empresas e dos transportistas", sinala.
O concelleiro tamén sitúa esta actuación dentro das necesidades de mellora das áreas industriais de Lugo. Na súa opinión, ademais do estacionamento de camións, cómpre avanzar en cuestións relacionadas cos accesos, a mobilidade, a seguridade, o saneamento e as conexións coa A-6 para reforzar as condicións nas que operan as empresas.
Neste sentido, Bustos lembra que o anterior Goberno municipal tamén reclamara unha conexión directa coa saída da A-6 na Campiña para facilitar os accesos ao polígono das Gándaras. "Se queremos que os nosos polígonos compitan en igualdade de condicións con outras zonas industriais do eixo da A-6, temos que ofrecer tamén as mesmas facilidades e servizos", sostén.
O Grupo Municipal Socialista pide finalmente ao Goberno local que informe sobre a situación actual da concesión, os trámites que permanecen pendentes e a previsión existente para que o aparcadoiro poida comezar a prestar servizo. "O que toca agora é executar, non seguir demorando", conclúe Bustos.