O TSXG avala a autorización da CHMS ao Club Fluvial de Lugo e rexeita o seu recurso
A Confederación Hidrográfica del Miño-Sil (CHMS), organismo autónomo adscrito ao Ministerio para a Transición Ecolóxica e o Reto Demográfico, recibiu a sentenza do Tribunal Superior de Xustiza de Galicia que desestima o recurso presentado polo Club Fluvial de Lugo contra a resolución de autorización emitida polo organismo de conca para o uso do dominio público hidráulico nas instalacións da entidade, situadas no barrio lucense de San Lázaro.
A orixe do procedemento remóntase ao recurso contencioso-administrativo interposto polo Club Fluvial contra a desestimación por silencio administrativo do recurso de reposición presentado o 10 de xullo de 2024. O devandito recurso cuestionaba a resolución ditada pola CHMS o 10 de xuño dese mesmo ano en relación coa autorización para o uso do dominio público hidráulico.
Segundo explicou o presidente da Confederación, José Antonio Quiroga, a principal discrepancia entre ambas partes estaba relacionada co cálculo do canon. O responsable do organismo sinalou que o Club Fluvial excluía nas súas medicións unha parte significativa da parcela catastral na que se atopan determinadas instalacións situadas dentro do perímetro valado e en terreos considerados dominio público hidráulico.
Para analizar as alegacións presentadas, a CHMS levou a cabo unha delimitación detallada do dominio público hidráulico en relación coas instalacións do club e realizou un cálculo individualizado da superficie ocupada por cada unha delas. Segundo o organismo, esta revisión permitiu achegar información precisa e contrastada que serviu de base para que o tribunal desestimase o recurso presentado pola entidade deportiva.
Máis aló deste procedemento xudicial, a Confederación lembrou que o Club Fluvial debe cumprir as condicións establecidas na concesión outorgada para o uso destes espazos, subliñando que a utilización do dominio público hidráulico non pode restrinxir os dereitos do resto da cidadanía.
Neste contexto, a CHMS informou de que actualmente mantén abertos dous expedientes sancionadores relacionados coas instalacións do club. Un deles refírese ao suposto incumprimento de varias condicións particulares vinculadas ao expediente de obras, entre elas a demolición da piscina infantil e o peche de instalacións deportivas consideradas permeables e desmontables. O segundo expediente está relacionado co presunto incumprimento da obriga de manter expedita unha zona de servidume alternativa.