O TSXG paraliza cautelarmente o parque eólico Estivada por posibles danos ambientais
O proxecto do parque eólico Estivada, promovido por Green Capital Power nos municipios de Agolada e Antas de Ulla, queda paralizado de forma cautelar por decisión do Tribunal Superior de Xustiza de Galicia (TSXG). A resolución responde á solicitude presentada por ADEGA e apunta á existencia de indicios de posibles danos ambientais que, segundo o tribunal, non quedan despexados coa documentación achegada pola Xunta e pola empresa promotora.
Esta é a terceira paralización cautelar deste tipo acordada pola sección terceira da Sala do Contencioso-Administrativo do TSXG a instancias da asociación ecoloxista, despois das relativas aos parques eólicos Pena do Pico e Fial das Corzas. A entidade destaca que a resolución sobre Estivada identifica posibles afeccións graves á conectividade ecolóxica e á biodiversidade da zona.
O tribunal considera que, malia contar cunha declaración de impacto ambiental favorable, os argumentos presentados pola Administración autonómica e pola empresa non eliminan a incerteza sobre os posibles efectos do proxecto. Por iso, aplica o principio de precaución para priorizar a protección ambiental mentres se resolve o procedemento xudicial. A resolución tamén sinala que actuar preventivamente resulta necesario para evitar que unha eventual sentenza favorable á protección do medio chegue demasiado tarde, cando os danos xa sexan irreversibles.
Oito aeroxeradores de 200 metros preto da Serra do Careón
O parque Estivada recibiu autorización en 2023 e contempla a instalación de oito aeroxeradores de 200 metros de altura en montes próximos á Serra do Careón, espazo integrado na Rede Natura 2000 e na súa área de ampliación.
ADEGA sostén que a avaliación ambiental do proxecto presenta carencias na análise dos impactos sobre a fauna e a flora, e denuncia que non se tería considerado adecuadamente a presenza de especies ameazadas, entre elas aves rapaces esteparias que aniñan en zonas próximas.
A asociación tamén alerta dunha posible fragmentación artificial entre Estivada e o parque eólico Zamorra, promovido pola mesma empresa e cuxa paralización cautelar foi acordada polo TSXG en 2025. Segundo ADEGA, os dous proxectos sitúanse nas proximidades de espazos da Rede Natura 2000 e das súas áreas de ampliación, polo que poderían crear unha barreira para o movemento da avifauna entre zonas naturais protexidas.
ADEGA cuestiona a tramitación ambiental da Xunta
A entidade ecoloxista enmarca esta resolución no debate sobre a situación do sector eólico galego. Tras decisións xudiciais que avalaron a autorización doutros parques por cuestións distintas das ambientais, a Xunta e a patronal eólica falaron dun desbloqueo do sector. ADEGA contrapón que as últimas paralizacións cautelares de Estivada, Fial das Corzas e Pena do Pico poñen o foco nas deficiencias das autorizacións ambientais.
A organización relaciona tamén a decisión coa polémica polo traslado dos maxistrados Luís Villares e Dolores López á sección cuarta da Sala, despois de que a Xunta cuestionase a súa actuación en relación coas paralizacións de parques eólicos. ADEGA defende que a situación actual non se debe ás decisións xudiciais nin á actuación das organizacións ecoloxistas, senón, ao seu xuízo, ás deficiencias da planificación e da tramitación administrativa.
A asociación cuestiona, ademais, a seguridade xurídica da normativa eólica galega e sinala que a Lei 8/2009 acumulou 105 modificacións mediante 14 leis posteriores. Para ADEGA, esta evolución evidencia a necesidade de revisar a planificación do sector e de incorporar criterios de sustentabilidade ambiental e xustiza social.
A resolución xudicial, segundo recolle a entidade, lembra que o desenvolvemento industrial non pode prevalecer sobre a protección dos elementos naturais cando exista risco de degradación ambiental. ADEGA insiste así na necesidade de situar a conservación do medio entre as prioridades da planificación enerxética.
A asociación atribúe tamén parte do éxito do proceso á colaboración da cidadanía e das persoas comprometidas coa protección ambiental, que contribuíron a financiar os custos xudiciais a través da campaña de micromecenado #TiPodesParalos.