Orbazai quenta motores para a súa XIV Foliada cunha xornada chea de música e tradición
A Asociación Airiños de Orbazai xa presentou o cartel da XIV Foliada de Orbazai, unha celebración que terá lugar o sábado 6 de xuño de 2026 e que volverá converter a parroquia lucense nun punto de encontro para a música tradicional, o baile e a convivencia.
A programación incluirá, un ano máis, a tradicional Feira de Artesanía, así como o festival de fin de curso das escolas da entidade organizadora, nunha xornada pensada para reivindicar a cultura popular galega e fomentar a participación veciñal.
O evento contará tamén cun xantar popular, para o que será necesario realizar reserva anticipada, ademais de diferentes actuacións musicais ao longo do día.
Entre os grupos participantes estarán As Xarutas, a Asociación Folclórica O Arco da Vella, procedente de San Miguel de Reinante, en Barreiros, as Cantareiras D’Xanares e o Grupo de Canto e Música Tradicional Airiños de Orbazai.
A celebración concluirá cun concerto do grupo Os Carecos e cunha foliada popular aberta, que servirá para poñer o broche final a unha das citas festivas e culturais máis consolidadas da contorna lucense.