Os Cinco Ríos organiza un curso gratuíto de ganchillo no Corgo
A asociación Os Cinco Ríos organiza un curso gratuíto de ganchillo que se desenvolverá durante oito sábados no Centro Sociocultural do Corgo. A actividade comezará o 12 de setembro e prolongarase ata o 31 de outubro, con sesións entre as 17.00 e as 20.00 horas.
As clases están pensadas para as persoas interesadas en iniciarse ou mellorar os seus coñecementos nesta técnica artesanal. Cada participante deberá levar o seu propio material, como fíos de la, algodón ou outros materiais, así como o ganchillo.
As prazas son limitadas e a organización establece preferencia para as persoas socias da entidade. As persoas interesadas en participar poden anotarse no teléfono 648 063 894, contactando con Mari Carmen.
Con esta iniciativa, Os Cinco Ríos continúa coa súa programación de actividades culturais e de lecer destinadas á veciñanza do municipio. A asociación, creada en 2019, desenvolve ao longo do ano propostas de carácter cultural, social e recreativo para contribuír á dinamización da vida no Corgo.
O curso conta coa colaboración da Deputación de Lugo, a través da Vicepresidencia, e do Centro de Artesanía e Deseño.