Os trens dirección A Coruña circularán con servizos alternativos por estrada durante sete días polas obras de Adif
A circulación ferroviaria con orixe ou destino na Coruña quedará interrompida entre o 5 e o 11 de novembro debido a unha nova fase das obras que Adif está a executar na estación de San Cristovo. Durante eses sete días, as persoas viaxeiras terán que completar parte dos seus desprazamentos en autobús, segundo o plan alternativo anunciado por Renfe.
A operadora explica que os traballos previstos na infraestrutura son incompatibles coa circulación de trens. Por este motivo, habilitaranse servizos por estrada en distintos tramos das conexións que habitualmente pasan pola estación coruñesa.
No caso dos trens Rexionais, Media Distancia, Avant e Alta Velocidade das conexións con Vigo, Ourense e Madrid-Chamartín, o traxecto entre A Coruña e Santiago de Compostela realizarase en autobús. Tamén se cubrirá por estrada o tramo entre A Coruña e Betanzos Infesta para os servizos de Media Distancia das liñas A Coruña-Lugo-Monforte-Ourense e A Coruña-Ferrol.
Tamén pode haber cambios o 4 e o 12 de novembro
Aínda que a interrupción principal se prolongará do 5 ao 11 de novembro, Renfe advirte de que os últimos servizos do día 4 e os primeiros da mañá do día 12 tamén poderían sufrir modificacións por necesidades operativas relacionadas coa disposición do material ferroviario.
A compañía sinala que os transbordos por estrada poden aumentar os tempos de viaxe e modificar os horarios de saída e chegada, así como as paradas intermedias. Por iso, recomenda consultar a información actualizada antes de iniciar o desprazamento.
As persoas viaxeiras que prefiran cambiar os seus plans poderán modificar ou anular os seus billetes sen custo, segundo as condicións comunicadas por Renfe. A información estará dispoñible a través das súas canles habituais, como a páxina web, a aplicación, as billeteiras e o teléfono 912 320 320.
Unha nova fase da transformación de San Cristovo
O corte ferroviario enmárcase nos traballos de transformación da estación da Coruña. A intervención require actuacións técnicas na infraestrutura antes de completar a nova configuración ferroviaria.
A interrupción coincide, ademais, coa apertura da nova estación de autobuses da intermodal, prevista para o 3 de novembro. Son dúas fases diferentes do proxecto: mentres a terminal de autobuses comeza a recibir desde hoxe todas as liñas interurbanas, a estación ferroviaria continúa en obras e aínda non está aberta ao público.
A posta en funcionamento da nova terminal de trens dependerá da finalización das actuacións pendentes e das correspondentes autorizacións de seguridade ferroviaria.