Palas de Rei mellora o acceso a Pidre para facilitar o transporte pesado e a actividade forestal
O Concello de Palas de Rei está a executar as obras de construción e acondicionamento da denominada Variante de Pidre, unha actuación destinada a mellorar a circulación na zona e facilitar o acceso de vehículos pesados e autobuses a Pidre, Cabana, Pambre, San Cibrao e outros lugares da contorna.
O proxecto beneficiará aproximadamente 260 veciños, que disporán dunha conexión máis axeitada coas súas explotacións, principalmente forestais, pero tamén agrogandeiras. Segundo o alcalde, Pablo Taboada, a intervención permitirá mellorar o acceso a máis de 300 hectáreas de aproveitamento forestal nos montes destas parroquias.
A vía presentaba limitacións para a circulación de camións de gran tamaño debido ao estreitamento existente en Pidre. Esta situación dificultaba o transporte da madeira e provocaba prexuízos aos propietarios das plantacións forestais, que non podían acceder con normalidade aos seus terreos con este tipo de vehículos.
O rexedor sinala que máis do 90 % dos veciños da zona teñen parcelas destinadas a aproveitamentos forestais, polo que considera que a mellora das comunicacións pode contribuír a impulsar a actividade económica e xerar riqueza no territorio.
Melloras tamén para autobuses e vehículos de emerxencias
A actuación facilitará igualmente o paso de autobuses escolares e turísticos, que ata agora atopaban dificultades para circular polo estreitamento da vía. Ademais, a ampliación e adecuación do acceso permitirá mellorar a mobilidade dos vehículos pesados de loita contra incendios en caso de emerxencia.
Pablo Taboada agradeceu a colaboración dos propietarios que cederon os terreos necesarios para executar as obras sen recibir compensación económica, unha contribución que, segundo destacou, redundará nun beneficio para o conxunto da zona.
Con esta intervención, o Concello busca resolver os problemas de accesibilidade existentes e mellorar as condicións para o desenvolvemento das actividades forestais e agrogandeiras, así como para a circulación de vehículos de maior tamaño.