Paquito D'Rivera, gañador de 18 premios Grammy, actuará no Festival de Jazz de Lugo co seu trío
O Festival Internacional de Jazz de Lugo, que se celebrará entre o 4 e o 14 de novembro, deu a coñecer un novo nome para a súa programación: o do músico cubano Paquito D'Rivera, unha das figuras de referencia do jazz a escala mundial. O artista, recoñecido tanto polo seu traballo co saxofón como co clarinete, ofrecerá un concerto xunto ao seu trío o 4 de novembro no Auditorio Fuxan os Ventos.
As localidades para esta actuación xa se poden adquirir a través da plataforma Ataquilla.com. Ademais, desde hoxe tamén están á venda as entradas para o concerto do Kenny Barron Trio, cuxa actuación se anunciara a semana pasada. Neste caso, a venda realízase a través da web Notikumi.com.
Unha traxectoria de máis de sete décadas
Compositor e arranxista ademais de intérprete, Paquito D'Rivera acumula 18 premios Grammy ao longo dunha carreira que supera os 70 anos. A súa obra caracterízase polo dominio da improvisación, as harmonías sincopadas e unha orquestración virtuosa que define o seu estilo persoal. Nela combínanse os ritmos e melodías afrocubanos coas influencias que foi reunindo nas súas numerosas viaxes, sen perder de vista as súas raíces musicais.
Gran afeccionado tanto ao jazz como á música clásica, consolidouse como unha das voces máis destacadas da música afrocubana e do latin jazz contemporáneo.
De neno prodixio a figura internacional
Nado en Cuba, D'Rivera comezou a súa andaina musical sendo un neno prodixio, tocando o clarinete e o saxofón coa Orquestra Sinfónica Nacional de Cuba. É fillo do saxofonista e director de orquestra Tito D'Rivera, e empezou a estudar música con só cinco anos. Aos sete xa subía aos escenarios e asinou un contrato con Selmer, coñecida firma fabricante de instrumentos musicais.
Foi ademais membro fundador e codirector de Irakere, un conxunto innovador creado xunto ao seu amigo Chucho Valdés, que destacou por unha mestura explosiva de jazz, rock, música clásica e música tradicional cubana.
Considerado un mestre do clarinete, así como do saxofón alto e soprano, recibiu numerosos recoñecementos pola súa importancia no jazz latino e pola súa faceta como compositor de música clásica. Entre eles figura o Premio Especial de The Latin Recording Academy, que distingue a súa contribución á música latina.