Planifican instalar unha rotonda e novos sentidos de circulación para mellorar o tráfico en Ramón Ferreiro
O Concello de Lugo avanza na planificación dunha reordenación integral do tráfico e da mobilidade na contorna da avenida de Ramón Ferreiro, un dos principais eixes viarios de Lugo e unha das zonas da cidade que concentra unha maior intensidade de circulación.
A intervención pretende mellorar o funcionamento da rede viaria neste ámbito, especialmente nos puntos de maior complexidade, ao tempo que busca reforzar a seguridade dos peóns e lograr unha distribución máis eficiente do tráfico e do espazo público.
O ámbito da actuación abrangue as avenidas de Ramón Ferreiro e Rodríguez Mourelo e as rúas Alcalde Anxo López Pérez, Salvador de Madariaga, Dinán, Senador Xacinto Calvo, Galicia e Celso Emilio Ferreiro, ademais da Praza da Bretaña e outras vías da contorna.
Unha das principais novidades será a substitución da actual rotonda debuxada na calzada no cruzamento das avenidas Ramón Ferreiro e Rodríguez Mourelo coas rúas Vilalba e Alcalde Anxo López Pérez por unha glorieta física. Segundo a planificación municipal, a solución actual non consegue garantir que todos os vehículos respecten os movementos establecidos, polo que a nova infraestrutura permitirá ordenar os percorridos, mellorar a fluidez e incrementar a seguridade.
A actuación incluirá tamén medidas para facilitar os desprazamentos peonís, entre elas o sobreancho da beirarrúa entre Vilalba e Bispo Aguirre e o retranqueo do paso de peóns situado en Rodríguez Mourelo.
Cambios nos cruzamentos e nos sentidos de circulación
A reordenación permitirá intervir tamén en varios dos cruzamentos máis complexos da zona. Así, están previstas actuacións nas interseccións de Ramón Ferreiro con Celso Emilio Ferreiro e Pintor Corredoira, así como no encontro entre Senador Xacinto Calvo, Celso Emilio Ferreiro e Galicia, co obxectivo de reducir os conflitos nos xiros e mellorar os itinerarios peonís.
Outra das modificacións previstas afectará aos sentidos de circulación. A rúa Celso Emilio Ferreiro pasará a ter dobre sentido, mentres que tamén se establecerá esta configuración nun tramo da Praza da Bretaña, entre Dinán e Senador Xacinto Calvo. O Concello sinala que este cambio permitirá mellorar a mobilidade e facilitar o funcionamento dos vehículos da Garda Civil.
A planificación inclúe ademais unha reorganización das zonas de carga e descarga. Neste sentido, trasladarase á marxe dereita a parada situada actualmente na marxe esquerda da avenida Alcalde Anxo López Pérez e reubicarase a zona de carga e descarga de Celso Emilio Ferreiro na propia avenida Ramón Ferreiro.
O Concello estudará novas prazas de estacionamento
A intervención tamén contempla analizar novas posibilidades para incrementar o número de prazas de estacionamento na contorna. O estudo centrarase nos espazos situados entre Pintor Corredoira e Fonte do Rei e na zona da Praza Horta do Seminario, así como nos ámbitos da rúa Cidade de Vigo e da Praza da Constitución.
Por outra banda, tamén se prevén melloras nos itinerarios peonís arredor do paseo central da mediana de Ramón Ferreiro, co propósito de garantir percorridos máis seguros e continuos. A intervención completarase coa renovación da sinalización horizontal e vertical.
O concelleiro de Mobilidade e Obras, Antonio Ameijide, sinalou que o Goberno municipal pretende abordar esta zona desde unha perspectiva global e planificada, tendo en conta os diferentes elementos que condicionan a circulación.
"Ramón Ferreiro é unha das principais vías de entrada e saída da cidade e concentra unha parte importante da circulación. Por iso, estamos a traballar nunha reordenación global que permita mellorar os cruzamentos, facilitar os desprazamentos dos peóns, optimizar os sentidos de circulación e buscar novas alternativas de estacionamento", afirmou.
Ameijide defendeu que a planificación busca anticiparse ás necesidades futuras de Lugo e compatibilizar os diferentes usos do espazo público, combinando a mellora da circulación coa seguridade peonil e coas necesidades dos residentes, dos servizos públicos e da actividade económica da zona.