Portomarín celebrará en setembro a IV edición dos Cantos de Taberna e a VIII Foliada
A Asociación Cultural Río Miño de Portomarín, coa colaboración do Concello, organiza o vindeiro 26 de setembro a IV edición dos Cantos de Taberna e a VIII Foliada, unha das citas máis destacadas do calendario cultural e musical da vila.
A programación dará comezo a partir das 18.00 horas e prolongarase ata ben entrada a noite. O evento incluirá un percorrido dos grupos participantes polos establecementos da localidade, unha cea popular, unha foliada aberta a todas as persoas asistentes e o tradicional conxuro da queimada, nunha xornada dedicada á música e á cultura popular galega.
A organización xa abriu o prazo de inscrición para os grupos que desexen participar. As solicitudes poderán presentarse entre o 1 de agosto e o 3 de outubro, seguindo a orde de inscrición e dando prioridade ás formacións que non participaron en edicións anteriores.
Desde a Asociación Cultural Río Miño destacan que o obxectivo desta iniciativa é continuar promovendo a música tradicional galega e converter Portomarín nun punto de encontro para músicos, cantareiras e afeccionados á foliada, favorecendo ao mesmo tempo a participación veciñal e a dinamización da actividade cultural e hostaleira do municipio.
As persoas interesadas poden obter máis información e formalizar a súa inscrición a través dos canais habilitados pola organización.