Presentada a moeda conmemorativa polo 25 aniversario do Arde Lucus
A Casa Consistorial do Concello de Lugo acolleu a presentación da moeda conmemorativa creada con motivo do 25 aniversario do Arde Lucus, unha peza deseñada e acuñada pola Asociación de Recreación Histórica e de Promoción Turística Cohors III Lucensium para celebrar esta efeméride.
No acto participou o presidente da entidade, Miguel Ángel Alvelo, quen explicou os detalles e o simbolismo dunha moeda que busca render homenaxe á evolución dunha das festas de recreación histórica máis recoñecidas de España e convertida xa nun referente turístico internacional.
A moeda incorpora diferentes elementos ligados á historia e ás orixes da cidade, combinando iconografía romana e castrexa, ademais de referencias directas ao XXV aniversario do Arde Lucus. Entre os motivos representados figuran unha aguia inspirada na columna da Praza de Santo Domingo, un torques castrexo e a inscrición “Natalis XXV”.
Durante a presentación puxouse en valor o traballo desenvolvido por Cohors III Lucensium e polo conxunto das asociacións de recreación histórica, así como a implicación da cidadanía na consolidación do Arde Lucus como Festa de Interese Turístico Internacional. Desde o Concello destacouse tamén a importancia do tecido asociativo para continuar fortalecendo unha celebración que se converteu nun dos principais referentes culturais, patrimoniais e turísticos da cidade.
A alcaldesa de Lugo, Elena Candia, agradeceu especialmente a acollida e a colaboración mostrada polas asociacións recreativas nesta nova etapa, destacando a súa disposición inmediata para traballar de maneira coordinada co Goberno local “nun momento no que acabamos de asumir a responsabilidade de goberno e co Arde Lucus xa moi próximo no calendario”.