Promoven o monitoreo tecnolóxico da catedral de Santiago e o monumento lucense de Santa Eulalia de Bóveda
O Goberno de España está liderando a transformación dixital na conservación do patrimonio cultural cun investimento de 225.000 euros no proxecto RETECH Knowledge Heritage Network (KHN), unha iniciativa para crear xemelgos dixitais cos que monitorizar a calidade do aire da Catedral de Santiago de Compostela e do templo romano de Santa Eulalia de Bóveda de Mera a través de simulacións derivadas do monitoreo continuado da humidade, a temperatura ou os fluxos de aire aos que se expoñen.
O delegado do Goberno en Galicia, Pedro Blanco, participou esta mañá en Santiago de Compostela na presentación do proxecto, destacando a histórica dixitalización que o Goberno de España está a realizar “ata o punto de fusionar edificacións tan emblemáticas como a catedral de Santiago ou o templo romano de Santa Eulalia de Bóveda de Mera coa última tecnoloxía en monitoreo”.
Ademais, puxo en valor outras iniciativas impulsadas polo Goberno de España para potenciar a transformación dixital de Santiago de Compostela. Neste sentido, destacou que “só desde a Secretaría de Estado de Dixitalización e Intelixencia Artificial se investiron case 20 millóns de euros na cidade, distribuídos en iniciativas dirixidas ás empresas como Kit Digital, Kit Consulting ou as Oficinas Acelera Pyme que concederon máis de 2.700 axudas por valor de case 12,5 millóns de euros”.
Tamén subliñou iniciativas dirixidas a que o talento sexa unha arma estratéxica de país, destacando que o Goberno está “sementando coñecemento para recoller soberanía” a través do Plan Nacional de Competencias Dixitais, con máis de 100.000 euros investidos en Santiago de Compostela promovendo centos de formacións, desde competencias básicas ata cursos avanzados de IA para profesionais.
RETECH-KHN
KHN intégrase no programa Redes Territoriais de Especialización Tecnolóxica (RETECH), un programa impulsado polo Ministerio para a Transformación Dixital e da Función Pública a través da Secretaría de Estado de Dixitalización e Intelixencia Artificial co obxectivo de exercer de panca transformadora e vertebradora dos sectores económicos máis relevantes do país. Este programa baséase na cogobernanza coas comunidades autónomas e ten como finalidade reforzar a cohesión territorial mediante proxectos de transformación dixital adaptados ás fortalezas de cada rexión.
Concretamente, coa réplica virtual do proxecto KHN baseada en datos recompilados durante os traballos de restauración e en modelos computacionais avanzados, axudará a comprender como inflúen factores como a orientación do edificio, os ventos atlánticos ou as estratexias de ventilación no comportamento do aire dentro do templo.
Por medio deste modelo preditivo, será posible anticipar situacións de risco para o patrimonio e definir medidas preventivas máis eficaces, cuxos resultados poderían aplicarse tamén a outros edificios históricos no futuro.
Este proxecto é unha das tres iniciativas RETECH nas que Galicia participa —Knowledge Heritage Network (KHN), Optimización das cadeas de valor en IA en sectores estratéxicos e Ecosistemas de emprendemento para desenvolver Xemelgos Dixitais—, que recibiron en conxunto un financiamento de 16,1 millóns de euros por parte do Goberno de España. Estas tres actuacións forman parte dun investimento global superior aos 200 millóns de euros de fondos europeos destinado a 13 proxectos estratéxicos distribuídos por todo o territorio nacional.
O director da Axencia Española de Supervisión da Intelixencia Artificial (AESIA), Alberto Gago, puxo en valor o alcance destas iniciativas durante a xornada divulgativa que se desenvolveu desde o proxecto, destacando que “con este tipo de iniciativas, o Goberno de España amplía o seu compromiso coa dixitalización, a sustentabilidade e a cohesión territorial, situando a tecnoloxía como unha ferramenta clave para afrontar os retos patrimoniais do presente e do futuro”.