Raíces do Vento reivindica o valor histórico do Camiño Rexio nun roteiro entre Duancos e Viladonga
A asociación Raíces do Vento organizou un roteiro polo Camiño Rexio no tramo comprendido entre Duancos e Viladonga, unha actividade que reuniu numerosos participantes co obxectivo de divulgar o valor histórico e patrimonial deste antigo itinerario da Terra Chá e chamar a atención sobre a necesidade da súa conservación.
Ao longo do percorrido, os asistentes contaron coas explicacións do historiador Ricardo Polín, que foi achegando información sobre a evolución histórica do camiño, os topónimos, a etnografía e as persoas que durante séculos transitaron por esta vía de comunicación. Desde a entidade agradeceron a súa colaboración, destacando o rigor e a calidade das explicacións ofrecidas durante toda a andaina.
A xornada completouse cunha visita guiada ao Castro de Viladonga dirixida polo arqueólogo Álvaro Pérez, socio da asociación, quen tamén realizou diferentes achegas sobre o patrimonio arqueolóxico presente ao longo do itinerario. Raíces do Vento agradeceu igualmente a colaboración do Concello de Castro de Rei, que facilitou un autobús para o traslado dos participantes ata o punto de inicio da actividade.
Segundo sinala a asociación, o roteiro serviu para poñer en valor un trazado histórico que durante séculos desempeñou un papel fundamental nas comunicacións da comarca e cuxa pegada continúa presente na paisaxe da Terra Chá.
Aproveitando a celebración da actividade, Raíces do Vento reiterou tamén a súa oposición ao proxecto da nova subestación eléctrica prevista en Ludrio. A entidade considera que esta infraestrutura suporía a industrialización da contorna do Camiño Rexio e dificultaría unha futura recuperación oficial deste trazado como parte do Camiño de Santiago.
Ademais, advirte de que un dos parques eólicos que evacuarían a súa produción a través desa subestación afectaría tamén á contorna dos Lagos de Teixeiro, modificando un espazo de elevado valor natural e paisaxístico.
A asociación conclúe defendendo a necesidade de preservar este patrimonio histórico e natural para as xeracións futuras e insiste en que o Camiño Rexio merece un futuro acorde coa relevancia histórica que tivo ao longo dos séculos.