Saint Jacques, o xogo de mesa sobre o Camiño Francés, preséntase ao alumnado de Palas de Rei
O alumnado do IES do Camiño de Palas de Rei puido coñecer e probar este luns Saint Jacques, un xogo de mesa inspirado no Camiño Francés que combina divulgación, cultura e entretemento. A iniciativa, promovida por Brinco Soluciones Integrales, conta co apoio da Xunta de Galicia a través do programa O Teu Xacobeo.
Na presentación participaron o alcalde de Palas de Rei, Pablo Taboada, e o director territorial da Consellería de Cultura, Lingua e Xuventude, Manuel Antonio Fernández Piñeiro, que acompañaron os estudantes durante a primeira toma de contacto co xogo.
A proposta toma como referencia o tradicional Xogo da Oca e utiliza un taboleiro de 90 casas polo que os participantes deben avanzar respondendo correctamente ás preguntas das cartas. O obxectivo é chegar primeiro á casa de Compostela e superar a fase final, na que hai que contestar cinco preguntas doutros xogadores.
Saint Jacques está pensado para partidas de entre dous e seis persoas e recoméndase a partir dos 16 anos. O xogo reúne 4.500 preguntas de diferentes niveis de dificultade, distribuídas en cinco bloques temáticos: Camiño de Santiago, cultura xeral, ciencia, cine e espectáculos e deportes.
O taboleiro tamén incorpora referencias a lugares destacados do Camiño Francés ao seu paso polos distintos municipios, co propósito de contribuír á súa difusión e poñer en valor o patrimonio da ruta xacobea. No caso de Palas de Rei, aparecen espazos como o castelo de Pambre e a igrexa de Vilar de Donas.
Nos próximos días, Brinco Soluciones Integrales prevé levar esta iniciativa a outros puntos do Camiño Francés, con actividades nas Casas do Maior de Portomarín e Triacastela.