San Miguel de Orbazai acollerá a terceira Xuntanza Cabalar cunha xornada de convivencia
A parroquia de San Miguel de Orbazai, en Lugo, acollerá o vindeiro 18 de abril de 2026 a terceira edición da Xuntanza Cabalar, unha cita que busca poñer en valor as rutas cabalares pola natureza, o contacto cos animais e a convivencia no medio rural.
A programación da xornada comezará ás 9:00 horas cun café de benvida para as persoas participantes. Posteriormente, ás 10:00 horas, terá lugar a saída da ruta cabalar, que permitirá percorrer distintos camiños da contorna natural da parroquia, favorecendo o desfrute da paisaxe e a relación directa cos cabalos. Durante o percorrido tamén haberá pinchos para as persoas asistentes.
Ao remate da ruta celebrarase unha sesión vermú amenizada pola orquestra Los Españoles, á que seguirá unha comida popular que incluirá café e chupito. O prezo da participación será de 30 euros para adultos, mentres que para o público infantil será gratuíto no caso dos nenos e nenas de 0 a 4 anos e de 15 euros para as idades comprendidas entre os 4 e os 12 anos.
A festa continuará pola tarde cunha nova actuación da orquestra Los Españoles, ademais dun sorteo de agasallos entre as persoas asistentes e unha pancetada que servirá como broche final da celebración.
Desde a organización lembran que a xornada está aberta a todas as persoas que desexen participar, mesmo sen necesidade de contar con cabalo, xa que o obxectivo principal é fomentar unha xornada de encontro e convivencia arredor da tradición cabalar e do medio natural. Tamén se indica que non se trata dunha competición e que cada asistente será responsable dos posibles danos ocasionados polo seu animal.
Para obter máis información ou formalizar a participación, as persoas interesadas poden contactar coa organización a través dos teléfonos 682 503 716 ou 622 283 117.