Santiago de Laxosa celebrará as súas festas os días 21, 22 e 23 de agosto con música, actividades infantís e actos relixiosos
A parroquia de Santiago de Laxosa, no concello do Corgo, celebrará as súas festas na honra da Nosa Señora os días 21, 22 e 23 de agosto, cun programa que combinará actuacións musicais, actos relixiosos e actividades para todas as idades.
As celebracións arrancarán o venres 21 coa verbena nocturna, que contará coa actuación da orquestra Punto Clave e coa animación de EvenTec e Cosme DJ. Ademais, entre as 22:00 e a 01:00 horas instalaranse colchóns inchables para o público infantil.
O sábado 22 comezará coa música de Asubíos da Chaira, que percorrerá a parroquia cun pasarrúas. A continuación celebrarase a sesión vermú amenizada polo Grupo Jaque. Pola tarde volverá haber pasarrúas con Asubíos da Chaira e, xa pola noite, a verbena correrá a cargo do Grupo Jaque e DJ Cëndoi.
Durante a xornada do sábado tamén haberá festa da escuma, de 19:00 a 20:00 horas, e inchables entre as 22:00 e a 01:00 horas, todas elas actividades gratuítas.
O programa rematará o domingo 23 coa celebración dunha misa solemne ás 12:30 horas no campo da festa. A continuación terá lugar a sesión vermú co Grupo Folixa, que tamén será o encargado de amenizar a tarde a partir das 19:00 horas. Ademais, haberá inchables gratuítos entre as 19:00 e as 21:00 horas.
A organización destaca que durante os tres días das festas o recinto contará con campo cuberto con carpa, co obxectivo de garantir o desenvolvemento das celebracións independentemente das condicións meteorolóxicas.