Transportes continúa as obras de mellora do firme na A-6 con actuacións entre Lugo e León
O Ministerio de Transportes e Mobilidade Sostible continúa coa execución das obras de rehabilitación estrutural do firme na calzada esquerda da autovía A-6 entre os quilómetros 407 e 480,5, nas provincias de Lugo e León. Os traballos contan cun investimento vixente de 8,8 millóns de euros, IVE incluído.
As actuacións desenvolveranse ao longo dos próximos meses e, segundo informou o Ministerio, provocarán diferentes afectacións ao tráfico co obxectivo de garantir a seguridade tanto dos traballadores como das persoas usuarias da vía. Está previsto que as restricións se prolonguen ata o mes de outubro.
As obras executaranse en distintas fases. A primeira delas arrancou este luns, 6 de xullo, entre os quilómetros 480,5 e 477,2. Posteriormente iranse ampliando progresivamente os tramos afectados entre os quilómetros 479,5 e 407 ata principios do mes de outubro.
Co obxectivo de minimizar as incidencias na circulación, habilitaranse itinerarios alternativos debidamente sinalizados. Nalgúns tramos establecerase circulación bidireccional pola calzada en sentido A Coruña mediante transferencias de tráfico, mentres que noutras fases se realizarán cortes totais con desvíos habilitados a través da estrada N-6.
Desde o Ministerio indican que esta actuación forma parte das intervencións destinadas á conservación e mellora das principais infraestruturas viarias, coa finalidade de incrementar a seguridade e mellorar as condicións de circulación nesta vía de comunicación.